اسلام آباد: حکومت پاکستان نے ڈیرہ غازی خان کے معذور شہری کے مکمل علاج و معالجے کی ذمہ داری اٹھانے کا اعلان کردیا۔
تفصیلات کے مطابق گزشتہ ماہ سوشل میڈیا پر آنکھوں سے نابینا ایک نوجوان کا ویڈیو پیغام وائرل ہوا تھا جس میں اُس نے عمران خان سے علاج کی اپیل کی تھی۔
نوجوان کا کہنا تھا کہ وہ اپنی آنکھوں کا علاج کروانا چاہتا ہے مگر معاشی تنگدستی کے باعث وہ کچھ نہیں کرسکتا، اُس نے شہریوں سے اپیل کی تھی کہ وہ اس ویڈیو کو اتنا شیئر کریں کہ آواز عمران خان تک پہنچ جائے۔
وفاقی وزیراطلاعات اور تحریک انصاف کے رہنما فواد چوہدری نے سماجی رابطے کی ویب سائٹ پر نوجوان کی ویڈیو ٹویٹ کی اور ساتھ میں لکھا کہ انہوں نے یہ ویڈیو سوشل میڈیا پر دیکھی۔
Watched this video on SM, We called this blind person from DG Khan. He was examined by the doctors.He has been blind since childhood. His left eye has no chance of recovery however Dr’s are evaluating his right eye for a transplant after he recovers from an existing infection. pic.twitter.com/G0ioxMXbNc
— Ch Fawad Hussain (@fawadchaudhry) October 14, 2018
فواد چوہدری کا کہنا تھا کہ ہم نے ڈیرہ غازی خان سے تعلق رکھنے والے نوجوان سے رابطہ کیا، ڈاکٹرز نے مریض کا معائنہ کیا اور بتایا کہ نوجوان کی آنکھوں میں بچپن سے ہی مسئلہ ہے۔
وفاقی وزیر اطلاعات نے آگاہ کیا کہ ڈاکٹرز پر امید ہیں کہ سیدھی آنکھ کا ٹرانسپلانٹ کر کے انفکیشن کو ختم کیا جاسکتا ہے جبکہ الٹی آنکھ کے ٹھیک ہونے کا کوئی امکان نہیں ہے۔