اسلام آباد : حکومت نے عید الاضحی پر قربانی سے متعلق گائیڈ لائنز جاری کردی، جس مین زیادہ سرکاری تعطیلات دینے ، پارکس، تفریحی مقامات بند رکھنے اور مویشی منڈیاں عید سے دس روز قبل قائم کرنے کی سفارش کی ہے۔
تفصیلات کے مطابق حکومت کی جانب سے عید الاضحی پرقربانی سےمتعلق گائیڈ لائنز صوبوں کو ارسال کردی گئی ہے، قربانی کی گائیڈ لائنز این سی او سی کی تیار کردہ ہیں۔
صدر مملکت نےگائیڈلائنز پرصوبوں،علما و مشائخ سے مشاورت کی، گائیڈ لائنز کا عنوان عیدالاضحی و قربانی کے انتظامات رکھا گیا ہے۔
گائیڈ لائنز میں این سی او سی نے عید الاضحی پر زیادہ سرکاری تعطیلات دینے ، پارکس، تفریحی مقامات بند رکھنے اور مویشی منڈیاں عید سے دس روز قبل قائم کرنے کی سفارش کی۔
مراسلے میں کہا گیا ہے کہ این سی او سی نے مویشی منڈیاں شہروں سے باہر قائم کرنے کی تجویز اور مویشی منڈی کا سائز کم، تعداد بڑھانے کی سفارش بھی کی ہے۔
نیشنل کمانڈ اور آپریشن سینٹر (این سی او سی) نے صوبوں کو مویشی منڈیوں کا مجوزہ نقشہ ارسال کردیا ہے۔
خیال رہے موثرحکمت عملی سے اسوقت پاکستان میں کورونا کے مریضوں میں کمی آئی ہے، مگرعوام کی ذرا سی بے احتیاطی ساری محنت پر پانی پھیرسکتی ہیں۔
عیدالالضحٰی کی آمد پر حکومت پاکستان نے کڑے اقدامات کا آغاز کرتے ہوئے مویشی منڈیوں کو شہر سے دورقائم کرنے کے احکامات جاری کردیئے ہیں اور شہریوں کو مویشی منڈیوں کیلئے بنائے گئے ایس او پیز پر سختی سے عمل کرنے کی ہدایت کی گئی ہے۔
ہدایات کے مطابق شہریوں سےاپیل کی گئی ہے کہ جانوروں کی خریداری کیلئےحکومت کی مقررہ کردہ مویشی منڈی جائیں، صرف وہ افراد جائیں، جنہوں نے خود قربانی کرنی ہے ، معمرافراد اور بچوں کومنڈی نہ لے کر جائیں۔
ماسک اور ہینڈ گلوزکا استعمال لازمی کریں اور اندرون شہرکسی بھی مویشی منڈی یا فرد سے جانور خریدنے سے گریز کریں، انفرادی قربانی کے بجائے اجتماعی قربانی کو ترجیح دیں اور قربانی کا گوشت زیادہ سے زیادہ ضرورت مندوں میں تقسیم کیا جائے۔
جانورکی قربانی اپنےعلاقے میں موجودہ حکومت کے مقرر کردہ ذبح خانوں، مختلف چیریٹی ،کمیونٹی تنظیموں اورآن لائن کے ذریعے کی جائے اورعید قرباں پر گھروں میں دعوت سے گریز کیا جائے۔
