لاہور : لنک روڈ زیادتی کیس کے مرکزی ملزم کی اہلیہ نے عابد سے متعلق لاعلمی کا اظہار کرتے ہوئے کہا عابد کے ساتھ گھرسے نہیں بھاگی بلکہ خوف کے باعث گھر چھوڑا۔
تفصیلات کے مطابق لنک روڈ زیادتی کیس کے مرکزی ملزم عابدکی اہلیہ بشریٰ بی بی نے پولیس کو ابتدائی بیان میں کہا کہ عابد کہاں ہے مجھے علم نہیں، گجر پورہ واقعےکے بعد خوف کے مارے گھر سے بھاگ گئی، میں عابد کے ساتھ گھر سے نہیں بھاگی ، گھر سے بھاگ کر مانگامنڈی میں روپوش ہوگئی تھی۔
گذشتہ روز پولیس نے کارروائی کرتے ہوئے مرکزی ملزم عابد علی کی اہلیہ کو حراست میں لے لیا تھا اور اہلیہ بشریٰ سے تفتیش کی جارہی ہے، عابد علی کی اہلیہ تحصیل تاندلیانوالہ کے ضلع فیصل آباد کی رہائشی ہے۔
مزید پڑھیں : گجرپورہ زیادتی کیس، مرکزی ملزم عابد کی اہلیہ گرفتار
پولیس ذرائع کا کہنا تھا کہ خاتون کی ملزم سے دوسری شادی تھی، بشریٰ کے سابقہ شوہر سے 4 بچے ہیں۔
خیال رہے پنجاب کی پولیس گجرپورہ واقعہ کے مرکزی ملزم عابد کواب تک گرفتار نہیں کر سکی، عابد کی گرفتاری کے لیے رات گئے قصور میں سرچ آپریشن کیا گیا تاہم پولیس ایک بار پھر ملزم کو گرفتار کرنے میں ناکام رہی۔
پولیس نے ملزم عابد سے دو روز قبل رابطے میں رہنے والے 5 رشتے داروں کو حراست میں لے لیا، مرکزی ملزم کے رشتے داروں سے تفتیش لاہور میں کی جائے گی۔
واضح رہے کہ چند روز قبل رات کو تقریباََ دو بجے گجرپورہ کے قریب موٹروے پر خاتون کو اس کے بچوں کے سامنے تشدد اور اجتماعی زیادتی کا نشانہ بنانے کا واقعہ پیش آیا تھا۔
