رپورٹر: علی محمد شر
کراچی: شہر قائد کے علاقے ابراہیم حیدری میں ایک ہوٹل میں لوٹ مار کے دوران مالک اور ڈاکوؤں میں فائرنگ ہوئی، جس میں مالک زخمی ہو گیا۔
تفصیلات کے مطابق کراچی کے علاقے ابراہیم حیدری میں واقع ہوٹل پر ڈاکوؤں نے واردات کرتے ہوئے ہوٹل پر بیٹھے شہریوں سے موبائل فون اور نقدی چھین لی، مسلح لٹیروں نے ہوٹل کے کیش کاؤنٹر سے بھی 40 ہزار روپے لوٹے۔
- Advertisement -
پولیس حکام کا کہنا ہے کہ واردات کے دوران ہوٹل مالک نے گودام سے نکل کر ڈاکوؤں پر فائرنگ کی، ڈاکوؤں نے بھی اس پر فائرنگ کی جس سے ہوٹل کا مالک زخمی ہو گیا۔
ہوٹل مالک کی مزاحمت کی وجہ سے ڈاکوؤں کو اپنی ایک موٹر سائیکل موقع پر چھوڑ کر فرار ہونا پڑا، پولیس حکام کے مطابق ڈاکوؤں کی تعداد 3 سے 4 بتائی جا رہی ہے، واقعے کے سلسلے میں تحقیقات جاری ہیں۔