کراچی: امیر جماعت اسلامی کراچی حافظ نعیم الرحمان کا کہنا ہے کہ کراچی کے مینڈیٹ پر وڈیرے اور جاگیردار قبضہ کرنا چاہتے ہیں ہم مینڈیٹ چوری کرنے کے خلاف احتجاج کریں گے۔
اے آر وائی نیوز کے مطابق امیر جماعت اسلامی کراچی حافظ نعیم الرحمان نے تحفظ کراچی مارچ سے خطاب کرتے ہوئے کہا کہ شہر قائد کے لوگوں نے جماعت اسلامی پر اعتبار کیا ہے، ہم نے دھرنے دیے تب انہوں نے بلدیاتی انتخاب کروائے، الیکشن کمیشن ان کی اے ٹیم بنا رہا، بار بار الیکشن ملتوی کیے گئے۔
حافظ نعیم نے کہا کہ جب دیکھا پی پی ہار رہی ہے تو فارم 11 اور 12 روک دیے، اپنی مرضی کے ریٹرننگ افسروں سے نتیجے بدلنا شروع کیے گئے۔
انہوں نے کہا کہ الیکشن کمیشن سے پیپلزپارٹی کا لکھا ہوا فیصلہ آیا، جماعت اسلامی نے پورے کراچی میں سب سے زیادہ ووٹ لیے، غیرمنصفانہ حلقہ بندیاں کی گئیں لیکن ہم نے مقابلہ کیا۔
امیر جماعت اسلامی کراچی نے کہا کہ تین بار الیکشن ملتوی کیے گئے لیکن ہم نے پیچھا کیا، ہماری جدوجہد سے مجبور ہوکر بلدیاتی انتخاب کروائے گئے، یہ کیسا ملک ہے جہاں اپنا حق لینے کے لیے احتجاج کرنا پڑتا ہے۔
انہوں نے کہا کہ کل سپریم کورٹ میں ہماری پٹیشن داخل ہورہی ہے، ہم پیچھے نہیں ہٹیں گے ان کا مقابلہ کریں گے، یہ سوچ رہے ہیں جو لوگ گرفتار ہیں ووٹ نہیں ڈالیں گے لیکن ہم 15 جون کو ان کے سارے ہتھکنڈوں کو ختم کردیں گے۔
