کراچی: شہر قائد کے علاقے کیماڑی میں ایک خاتون نے اسکول سے بچی اٹھا لی، پولیس کو اطلاع ملنے کے چند گھنٹوں بعد ہی ٹیم نے اغوا کار خاتون کو دھر لیا۔
تفصیلات کے مطابق کیماڑی کے علاقے میں ایک اسکول سے ساڑھے 4 سالہ بچی اغوا ہو گئی، تفتیشی ٹیم تھانہ جیکسن کی کامیاب کارروائی میں بچی کو چند گھنٹوں میں بازیاب کرا لیا گیا اور اغوا کار خاتون گرفتار ہو گئی۔
ایس ایس پی انوسٹیگیشن ڈسٹرکٹ کیماڑی توحید رحمٰن میمن کے مطابق جیکسن تھانے میں گزشتہ شب ساڑھے چار سالہ بچی دختر محمد وقاص کے اغوا کا پرچہ درج کروایا گیا، بچی کو اسکول سے کوئی نامعلوم خاتون لے کر چلی گئی تھی۔
مقدمے کے اندراج کے بعد تھانہ جیکسن کے تقتیش کے یونٹ نے ایس آئی او جیکسن، انسپکٹر غزالہ کی سربراہی میں تکنیکی بنیادوں پر فی الفور کام شروع کیا اور اندراجِ مقدمہ کے کچھ ہی گھنٹوں میں بچی کا سراغ لگا کر ملزمان کو بھی گرفتار کر لیا۔
ذرائع کا کہنا ہے کہ ثمینہ زوجہ کامران نے بچی کے والدین کو تاوان کے لیے کال کی تھی، پولیس نے کال ٹریس کی اور لیاری کے علاقے میں کارروائی کرتے ہوئے بچی بازیاب کی اور ملزمہ کو گرفتار کر لیا۔ بتایا گیا ہے کہ اغوا کار نے 30 لاکھ روپے تاوان کا مطالبہ کیا تھا۔
ترجمان پولیس کے مطابق بازیاب بچی کو والدین کے حوالے کر دیا گیا ہے جب کہ دیگر ملزمان کی گرفتاری کے لیے مختلف مقامات پر چھاپے مارے جا رہے ہیں۔
