لاہور: اپوزیشن لیڈر پنجاب اسمبلی حمزہ شہباز نے اسپیکر پرویز الہیٰ پر سنگین الزامات عائد کردئیے۔
تفصیلات کے مطابق لاہور میں میڈیا سے گفتگو کرتے ہوئے حمزہ شہباز نے الزام عائد کیا کہ پرویز الہیٰ نے آج اسمبلی میں توڑ پھوڑ کرائی اور خود ہی کمیٹی بنادی، انہیں وارننگ دیتا ہوں کہ توڑپھوڑ کی ذمہ داری ہم پر نہ ڈالیں۔
حمزہ شہباز نے دعویٰ کیا کہ پرویزالٰہی چاہتےہیں کہ ہمارے 40ارکان کو معطل کردیا جائے، انہوں نے یہ حرکت پہلے بھی کی تھی ہم نےچیلنج کیاتھا، اسپیکر پنجاب اسمبلی کی حرکتیں قوم نےدیکھ لی ہیں۔
اپوزیشن لیڈر پنجاب اسمبلی نے میڈیا سے گفتگو میں عدلیہ سے درخواست کی کہ پنجاب اسمبلی میں ووٹ دہی یقینی بنائی جائے، مجھے وزیراعلیٰ پنجاب بننےکا کوئی شوق نہیں لیکن ایک مقصدہے کہ آئین اور قانون کی حکمرانی کے ساتھ کھلواڑ بند کیا جائے۔
یہ بھی پڑھیں: ’آپ پرویز الہیٰ کو پنجاب کا سب سے بڑا ڈاکو کہتے تھے‘
میڈیا سے گفتگو میں حمزہ شہباز کا کہنا تھا کہ عثمان بزدار کو وزیراعلیٰ پنجاب بناکر پنجاب کیخلاف سازش کی گئی، عمران خان غریب کا گھر جلا دیتےہیں مگر اپناب نی گالہ کا گھرریگولرائز کرادیتے ہیں، عمران خان سن لیں ان کی بادشاہت نہیں 22کروڑعوام کی ریاست ہے۔
حمزہ شہباز کا کہنا تھا کہ پنجاب اسمبلی میں عددی اکثریت سےہمارےنمبرز پورے تھے، پنجاب اسمبلی میں لیڈر آف دی ہاؤس کو منتخب کرنا تھا، ہماری کامیابی کو دیکھ کر کل پنجاب اسمبلی میں ہمارے ارکان پرحملےکیےگئے جبکہ ڈپٹی اسپیکر نے آئین اور قانون کیخلاف رولنگ دی۔
پنجاب اسمبلی کے اپوزیشن لیڈر کا کہنا تھا کہ سابق گورنرپنجاب نے بھی کل کہا کہ پنجاب میں رشوت کا بازار گرم ہے، ایک ایک افسر کی تعیناتی کیلئے ریٹ طےکیےجاتےہیں، پنجاب کے نواحی علاقوں میں لوٹ مارہوتی ہے، ریپ کیےجاتےہیں مگر افسران کوئی نوٹس نہیں لیتے کیونکہ وہ رشوت پر تعینات ہوتےہیں۔
