کراچی: ملیر جیل میں قیدیوں سے ملاقات کے لیے آنے والی خواتین کو ہراساں کیے جانے کا انکشاف ہوا ہے۔
تفصیلات کے مطابق کراچی کے ملیر جیل میں اپنے قیدی بیٹے سے ملاقات کے لیے جانے والی ہراسگی کی شکار خاتون نے جیل کے سپاہی محمد زبیر سہتو کے خلاف اعلیٰ حکام کو خط لکھ دیا ہے۔
متاثرہ خاتون نے خط میں کہا کہ ان کا بیٹا ڈیڑھ سال سے جیل میں قید کاٹ رہا ہے، انھوں نے کہا ’’بیٹے سے ملاقات کے لیے جیل جاتی ہوں تو سپاہی زبیر سہتو مجھے ہراساں کرتا ہے۔‘‘
خاتون نے خط میں یہ بھی کہا کہ ’’سپاہی زبیر سہتو میری بیٹیوں سے بھی ناجائز اور غلط مطالبات کرتا ہے۔‘‘
اس سلسلے میں ڈپٹی سپرٹنڈنٹ ملیر جیل کامران شیخ نے اے آر وائی نیوز سے گفتگو کرتے ہوئے بتایا کہ محمد زبیر سہتو اسسٹنٹ جیل سپرٹنڈنٹ نبی داد زرداری کے دفتر میں تعینات ہے۔
کامران شیخ کے مطابق با اثر سپاہی زبیر سہتو خود کو سپرٹنڈنٹ سینٹرل جیل حسن سہتو کا کزن بتاتا ہے۔
ڈپٹی سپرٹنڈنٹ ملیر جیل نے کہا ’’متاثرہ خاتون کی شکایت محکمہ داخلہ کو موصول ہو گئی ہے، اعلیٰ جیل حکام اس معاملے کی شفاف تحقیقات کریں گے۔‘‘
