ہریس یا ہریسہ، حلیم سے ملتا جلتا ایک عربی پکوان ہے، یہ پکوان دنیا کے کئی ممالک میں مقبول ہے۔ اسے گھر میں بھی نہایت آسانی سے بنایا جاسکتا ہے جس کی ترکیب مندرجہ ذیل ہے۔
اجزا
گوشت (مٹن یا بیف): 1 کلو بغیر ہڈی
مونگ کی دال: آدھی چھٹانک
چاول: آدھی چھٹانک
گندم: 1 پاؤ
ادرک: حسب ضرورت
لہسن: حسب ضرورت
پیاز: حسب ضرورت
دھنیا: حسب ضرورت
سیاہ مرچ: 4 چائے کے چمچ پسی ہوئی
نمک: حسب ضرورت
گھی: حسب ضرورت
ترکیب
چاول اور دال کو اکٹھا ابال لیں اور گندم کو بھگو کر رکھ دیں۔
گھی میں 2 درمیانے سائز کے پیاز کاٹ کر تل لیں۔
جب پیاز لال ہو جائے تو اس میں گوشت بھی ملا لیں۔
اس کے ساتھ ہی ادرک اور لہسن کوٹ کر ڈال دیں۔
جب گوشت کا پانی خشک ہو جائے تو اس میں وافر مقدار میں پانی ڈال دیں۔
جب گوشت گل جائے تو اسے پانی میں سے نکال کر موٹا موٹا کوٹ لیں۔
اس کوٹے ہوئے گوشت کو دوبارہ پانی میں ڈال دیں، اس کے ساتھ گندم اور ابلی ہوئی دال اور چاول بھی ڈال دیں اور اسے پکنے دیں۔
اگر ضرورت ہو تو مزید پانی بھی ڈال لیں۔
گندم کا دانہ نکال کر چیک کریں، اگر اچھی طرح گل گیا ہو تو اس میں گھوٹنا چلائیں اور پکاتے رہیں تاکہ سب چیزیں باہم یکجان ہوجائیں۔
اس کے بعد کالی مرچ اور نمک ڈال دیں۔
اب کسی علیحدہ برتن میں گھی ڈال کر اس میں پیاز کاٹ کر ڈالیں اور جب خستہ ہوجائے تو نکال لیں۔
یہ پیاز نکالا ہوا گرم گرم گھی ہریسہ پر ڈال دیں، اس کے ساتھ چمچ بھی ہلائیں۔
مزیدار ہریسہ تیار ہے، اس کو ڈونگوں میں نکال لیں۔
اس کے اوپر تلی ہوئی پیاز اور دھنیا چھڑک کر نان کے ساتھ پیش کریں۔
