ایک بوڑھے آدمی کا نام چُنگ لَنگ تھا، مطلب “چٹانوں کا ماہر”، اور اس کی پہاڑوں میں چھوٹی سی جائیداد تھی۔
ایک روز اس کے گھوڑوں میں سے ایک گم ہو گیا۔ اس کے ہمسائے آئے اور اس کے ساتھ بدقسمتی کی وجہ سے پیش آنے والے اس واقعے پر افسوس کرنے لگے۔
اس بوڑھے نے لیکن پوچھا، “تم نے یہ کیسے جانا کہ یہ بدقسمتی ہے؟” پھر چند روز بعد وہ گھوڑا واپس آ گیا اور اپنے ساتھ جنگلی گھوڑوں کی ایک بڑی ٹکڑی بھی لے آیا۔ ہمسائے پھر آ گئے اور اسے اتنی اچھی قسمت پر مبارک باد دینے لگے۔ اس پر پہاڑوں میں رہنے والے بوڑھے نے پھر پوچھا، “تم نے یہ کیسے جانا کہ یہ خوش قسمتی ہے۔”
اب چونکہ گھوڑے کافی زیادہ ہو گئے تھے، تو بوڑھے آدمی کے بیٹے کو گھڑ سواری کا شوق ہوا۔ ایک دن اسی شوق کی تکمیل میں وہ اپنی ٹانگ تڑوا بیٹھا۔ ہمسائے پھر آ گئے کہ اس بوڑھے سے افسوس کا اظہار کر سکیں۔ اس مرتبہ بھی اس نے ان سے یہی پوچھا، “تم نے یہ کیسے جانا کہ یہ بدقسمتی کی بات ہے؟”
اگلے برس “ریاستی لٹھ برداروں” کا کمیشن پہاڑوں میں آیا تاکہ توانا مردوں کو بادشاہ کی پیدل فوج کے سپاہیوں اور شاہی پالکیاں اٹھانے والوں کے طور پر بھرتی کر کے ساتھ لے جا سکے۔ انہوں نے بوڑھے کے بیٹے کو، جس کی ٹوٹی ہوئی ٹانگ ابھی ٹھیک نہیں ہوئی تھی، اپنے ساتھ نہ لے جانے کا فیصلہ کیا۔ چُنگ لَنگ یہ دیکھ کر مسکرا دیا۔
(ہَرمن ہَیسے کی ایک تصنیف سے ماخوذ، مترجم مقبول ملک)
