ملتان : ایچ بی ایل پاکستان سپر لیگ (پی ایس ایل) کے آٹھویں سیزن کا آغاز آج سے ہوگا، افتتاحی میچ میں لاہور قلندرز اور ملتان سلطانز کی ٹیمیں مد مقابل ہوں گی۔
پاکستان کے سب سے بڑے آٹھویں کرکٹ میلے کی رنگا رنگ افتتاحی تقریب ملتان کرکٹ اسٹیڈیم میں منعقد ہوگی، گلوکار ساحرعلی بگا، عاصم اظہر، فارس شفیع، شائے گل اور آئمہ بیگ اپنی آوازوں کا جادو جگائيں گے۔
پاکستان سپر لیگ سیزن 8 کی افتتاحی تقریب میں شاندار آتش بازی بھی کی جائے گی، اس تقریب میں اے آر اور وی آر ٹیکنالوجی کا استعمال بھی کیا جائے گا جس میں ٹی وی شائقین کو کرکٹ گراؤنڈ کے اندر سے خوبصورت اور دیدہ زیب گرافکس دکھائی دیں گے۔
افتتاحی تقریب میں ڈرون ایل ای ڈی سے فضاء میں تصاویر بنائی جائیں گی، ایونٹ کے میچز ملتان، کراچی، لاہور اور راولپنڈی میں بھی کھیلے جائیں گے۔
مزید پڑھیں : ’سب ستارے ہمارے‘ پی ایس ایل کا آفیشل ترانہ ریلیز
پی ایس ایل میں ہر ٹیم 10 میچز کھیلے گی۔ چار ٹیمیں پلے آف مرحلے میں جائیں گی۔ ایونٹ میں شریک تمام ٹیمیں ایک ایک بار ٹرافی جیت چکی ہیں۔
پاکستان سپر لیگ سیزن 8 کا آفیشل گانا ’’سب ستارے ہمارے‘‘ جاری کردیا گیا، جسے شے گل، عاصم اظہر اور فارس شفیع نے گایا ہے۔ پی ایس ایل 8 کا آفیشل گانا عبداللہ صدیقی نے پروڈیوس کیا ہے۔
پی ایس ایل 8 کے آفیشل گانے کی ویڈیو کے شروع میں گھڑ سواروں کو تمام ٹیموں کے جھنڈے تھامے ہوئے دکھایا گیا ہے، جبکہ شے گل گانے کا آغاز کرتی ہیں، اس کے بعد عاصم اظہر اور پھر فارس شفیع آتے ہیں۔
