کراچی: شہر قائد کے علاقے ناگن چورنگی کے نالے سے بھاری پتھر نکل آئے۔
تفصیلات کے مطابق نامعلوم افراد کی جانب سے ناگن چورنگی نالے میں بھاری پتھر ڈال کر اسے چوک کرنے کی کوشش کی گئی ہے، تاہم واٹر بورڈ کے عملے نے نالے سے بھاری پتھر نکال لیے۔
واٹر بورڈ عملے نے مرتضیٰ وہاب کے حکم پر نالے سے بھاری پتھر نکالے، میئر کراچی مرتضیٰ وہاب نے نالے کو بھاری پتھر ڈال کر چوک کرنے کو سازش قرار دے دیا۔
ناگن چورنگی نالے کے دورے کے موقع پر میئر کراچی نے کہا کہ ایک بار پھر وہی حرکتیں شروع کر دی گئی ہیں، شہر سب کا ہے، یہاں ہمارے اپنے بستے ہیں، انھوں نے کہا کہ ناگن چورنگی نالا چوک ہوگا تو نقصان شہریوں کا ہوگا۔
واضح رہے کہ ماضی میں بھی کراچی میں ایسے مذموم واقعات ہوتے رہے ہیں، نالوں میں بھاری پتھر ڈال کر انھیں جان بوجھ کر چوک کر دیا جاتا ہے، جس کی وجہ سے بارشوں میں آس پاس کے علاقے پانی میں ڈوب جاتے ہیں۔