اسرائیلی فوج کی جانب سے یہ دعویٰ سامنے آیا ہے کہ کل شام لبنان کے دارالحکومت بیروت کے جنوب میں حزب اللہ کمانڈر سُہیل حسین حسینی کو شہید کردیا ہے۔
غیر ملکی ذرائع ابلاغ کے مطابق اسرائیلی فوج کے مطابق حزب اللہ کمانڈر حسینی ایران اور حزب اللہ کے درمیان ہتھیاروں کی منتقلی اور تقسیم اوران کی مالی معاونت کے ذمہ دار تھے۔
اسرائیلی فوج کے مطابق حسینی لبنان اور شام میں حزب اللہ کے حساس منصوبوں کے لاجسٹکس امور کے ذمے دار بھی تھے۔
اسرائیلی فوج کی جانب سے یہ دعویٰ سامنے آنے کے بعد حزب اللہ کی جانب سے اس معاملے پر کوئی بیان جاری نہیں ہوا۔
واضح رہے کہ 8 اکتوبر 2023 سے اسرائیلی فوج کی جانب سے غزہ میں بربریت کا سلسلہ جاری ہے، جبکہ اب لبنان میں بھی خون کی ہولی کھیلی جارہی ہے اور بے گناہوں کا خون بہایا جارہا ہے۔
دوسری جانب اسرائیلی افواج کی جانب سے لبنان کے جنوبی مغرب میں زمینی آپریشن شروع کرنے کا اعلان کردیا گیا ہے۔
رپورٹ کے مطابق اسرائیلی فوج کا اس حوالے سے کہنا ہے کہ لبنان کے جنوبی مغرب میں اس کے 146 ویں ریزرو ڈویژن نے زمینی آپریشن کا آغاز کردیا ہے۔
اسرائیلی فوج کا کہنا ہے کہ گزشتہ روز سے جنوب مغربی لبنان میں حزب اللّٰہ کے خلاف محدود، مقامی اور ٹارگٹڈ آپریشنز کا آغاز کردیا گیا ہے۔
حزب اللہ کا اسرائیل کے ملٹری انٹیلی جنس یونٹ پر میزائل حملہ
بیان کے مطابق 146 واں ریزرو ڈویژن پہلا ریزرو ڈویژن ہے جو جنوبی لبنان میں حزب اللّٰہ کے خلاف زمینی کارروائیوں میں حصہ لے رہا ہے۔
