لاس اینجلس : ہالی وڈ کی فلم ایٹرنل میں پاکستانی اداکار اپنی صلاحیتوں کے جوہر دکھائیں گے، کراچی سے تعلق رکھنے والے کُمیل نانجیانی ہالی وڈ میں سپر ہیرو کا کردار ادا کرنے والے پہلے پاکستانی بن گئے ہیں۔
صوبہ سندھ کے دارالحکومت کراچی میں پیدا ہونے والے کمیل ایٹرنل میں سپر ہیرو کا کردار نبھائیں گے اس سے قبل بھی وہ امریکا میں کئی سیریز اور فلموں میں مرکزی کردار نبھا چکے ہیں۔
کمیل نانجیانی کی فلم ایٹرنل کا پہلا مکمل ٹریلر گزشتہ روز ریلیز کیا گیا۔ ٹریلر میں فلم کے لافانی کرداروں کو سپر ہیومن پاورز کے ذریعے ایک اسپیس شپ میں ساحل سمندر کی جانب جاتے ہوئے دکھایا گیا ہے۔
فلم کی کاسٹ میں کمیل نانجیانی کے علاوہ ہالی وڈ کی صفِ اول کی اداکارائیں انجلینا جولی اور سلمیٰ ہائیک شامل ہیں۔
ٹریلر میں سلمیٰ ہائیک کو یہ کہتے سنا جا سکتا ہے کہ ہم سیارے کے لوگوں نے ہمیشہ زمین پر رہنے والوں کا خیال رکھا ہے سوائے ان کے جو ہمارے سیارے میں مداخلت کرتے ہیں۔
مارول موویز کے مداحوں کا کہنا ہے کہ ٹریلر دیکھ کر اندازہ ہو رہا ہے کہ یہ فلم کتنی دلچسپ ہوگی۔
