کراچی : گڈاپ تھانے کی حدود میں تین روز قبل نوجوان کی ہاتھ پاؤں بندھی لاش ملنے کے واقعہ میں اہم پیشرفت سامنے آئی ہے۔
پولیس کے مطابق دہرے قتل کی لرزہ خیز واردات غیرت کے نام پر ہوئی، مقتول نوجوان پنہوں صدر میں کار پارکنگ کا کام کرتا تھا۔
اس حوالے سے تفتیشی افسر کا کہنا ہے کہ ملزمان نے پہلے نوجوان پنہوں کو غیرت کے نام پر کراچی میں قتل کیا پھر ہالا سعید آباد میں اپنی بہن کو قتل کرکے اس کی لاش دریا میں پھینک دی تھی۔
پولیس کے مطابق مقتولہ کی لاش ٹنڈوآدم سے برآمد ہوئی تھی، مقتول پنہوں اور سوہنی کو غیرت کے نام پر قتل کیا گیا ہے، بعد ازاں سعیدآباد پولیس نے دہرے قتل میں ملوث 2ملزمان کو گرفتار کرلیا۔
ملزم نے اپنے اعترافی ویڈیو بیان میں پولیس کو بتایا کہ میں نے اپنے بھائی کے ساتھ مل کردونوں قتل کیے، پنہوں کو کراچی ٹول پلازہ کے قریب پھندہ لگا کرقتل کیا اور پھر اپنی بہن کا گلہ کاٹ کر اسے قتل کیا اور لاش دریا میں پھینک دی تھی۔
یاد رہے کہ26مئی کو سپر ہائی وے وادی حسین قبرستان کے قریب سے نامعلوم نوجوان کی ہاتھ پاؤں بندھی پھندا لگی لاش ملی تھی، پولیس کے مطابق لاش پرانی ہونے کے باعث کافی خراب ہوگئی تھی شناخت نہ ہونے کی وجہ سے لاش کا پوسٹ مارٹم مکمل کرا کے اسے سرد خانے منتقل کردیا گیا تھا۔
