واشنگٹن : امریکی ایوان نمائندگان کی عدالتی کمیٹی نےصدرٹرمپ کے مواخذے سےمتعلق تحقیقات تیز کرنے کی منظوری دے دی، تحقیقات کی روشنی میں قانون ساز فیصلہ کرسکیں گے کہ صدرٹرمپ کے مواخذے کی سفارش کی جائے یا نہیں۔
تفصیلات کے مطابق امریکی ایوان نمائندگان میں صدر ٹرمپ کے مواخذے کی گونج سنائی دی ، ڈیموکریٹک رکن جیرالڈ نیڈلر کی سربراہی میں ایوان نمائندگان کی اکتالیس رکنی عدالتی کمیٹی نے صدر ٹرمپ کےخلاف تحقیقات تیز کرنے کی منظوری دے دی۔
کمیٹی نے سترہ کے مقابلے میں چوبیس ووٹوں سے قرارداد کی منظوری دی۔
عدالتی کمیٹی نے گزشتہ روز صدر ٹرمپ کے خلاف مواخذے سے متعلق ایک نیا طریقہ کار طے کیا ہے، یہ پیشرفت ایک ایسے وقت پر سامنے آئی ہے جب قانون ساز اسمبلی میں کارروائی کے چالیس سے کم دن رہ گئے ہیں۔
جمعرات کو ہونے والی ووٹنگ میں کمیٹی کے چیئرمین کو معلومات کے تجزیے، مواخذے اور گواہوں سے متعلق طریقہ کار طے کرنے کیلئے اجلاس بلانے کا اختیار دیا گیا، صدر ٹرمپ کی قانونی ٹیم سے پیش کردہ معلومات کا تحریری جواب بھی طلب کیا جائے گا۔
خیال رہے ایوان نمائندگان کے ایک سو پینتیس ڈیموکریٹ ارکان صدرٹرمپ کے مواخذے کے حامی ہیں، مواخذے کو کامیاب بنانےکے لیے دوسو اٹھارہ ووٹوں کی ضرورت ہے۔
