ریاض : سعودی عرب میں مکانات کے کرایے کم ہونے لگے ، سال رواں کے دوران مکانات کے کرائے 15 تا 20 فیصد تک کم ہونے کا امکان ہے جبکہ 2020 میں مکانات کے کرائے مزید کم ہوں گے۔
تفصیلات کے مطابق وزارت آباد کاری کی جانب سے مقامی شہریوں کو مفت مکانات فراہم کرنے کی مہم کے ابتدائی اثرات نمایاں ہونے لگے اور اضافی مکانات کی تعمیر کے باعث کرائے کم ہورہے ہیں۔
وزارت آباد کاری نے کرایوں کو منظم کرنے کے لیے ’ایجار‘ کے عنوان سے نئی ایپلی کیشن متعارف کرادی ہے۔
الاعمار ہولڈنگ کمپنی کے ڈائریکٹر جنرل راشد التمیمی کا کہنا ہے کہ ہر طرح کے مکانات کی طلب میں واضح کمی ریکارڈ کی جارہی ہے مکانات ہی نہیں دکانوں کے کرائے بھی متاثر ہورہے ہیں،
راشد التمیمی نے مزید کہا کہ مکانات میں کرایوں میں کمی کا وزارت آباد کاری کی مکان پالیسی ہے، جس کے تحت زیادہ سے زیادہ شہریوں کو مکانات کا مالک بنایا جارہا ہے اور سعودی عرب کی تاریخ میں اتنے بڑے پیمانے پر مکانات کے مالک کبھی نہیں بنائے گئے۔
غیر منقولہ جایئدادوں کا کاروبار کرنے والوں نے توقع ظاہر کی ہے کہ رواں سال کے دوران مکانات کے کرائے 15 تا 20 فیصد تک کم ہونے کا امکان ہے۔
خیال رہے تارکین وطن کا کثیر تعداد میں سعودی عرب میں مقیم ہے، غیر ملکیوں نے مکانات کرائے پر لیے ہوئے، ان حالات میں مکانات کی تعداد بڑھ جانے اور طلب گھٹ جانے کی وجہ سے کرائے کم ہوتے چلے جارہے ہیں۔
