کراچی: پاکستان کےناموراداکار اور پروڈٰیوسرہمایوں سعید اپنی آںے والی فلم ’میں پنجاب نہیں جاؤں گی‘ میں ایمان علی کے ساتھ جلوہ گرہوں گے۔
تفصیلات کے مطابق اپنے آنے والے فلم پروجیکٹ کے بارے میں بہت سوچ و بچار اور قیاس آرائیوں کے بعد ، ہمایوں سعید نے اپنی ذاتی پروڈکشن ’میں پنجاب نہیں جاؤں گی‘ میں اداکارہ ایمان علی کے بالمقابل اداکاری کے جوہر دکھانے کاباضابطہ اعلان کردیا ہے۔
واضح رہے کہ ہمایوں سعید کو ان کی ذاتی پروڈکشن سکس سگما پلس کے ڈائریکٹر ندیم بیگ اور رائٹر خلیل الرحمن قمر کے ساتھ یورپ میں لوکیشن کی تلاش کرتے ہوئے دیکھا گیا تھا تب سے ہی اس فلم کے قصے زبان زدِ عام ہیں۔
’میں پنجاب نہیں جاؤں گی‘ ایک رومانٹک کامیڈی ہوگی اوراس کی شوٹنگ جلد شروع ہونے کی توقع ہے۔
فی الوقت ہمایوں سعید، ڈائریکٹر حسن وقاص رعنا کے رزمیہ جنگی ڈرامے ’یلغار‘ کے آخری دورکی شوٹنگ میں مصروف ہے جس میں وہ مخالف دشمن کا کردار ادا کررہا ہے۔
ایک پروڈیوسر کے طور پر ہمایوں کے مصروف شیڈول میں 2016کے لیے چار فلمیں ہیں، جن میں سے ایک ’’جوانی پھرنہیں آنی‘ کا اگلا حصہ ہوگی۔
