برلن: جنگ میں یوکرین کا ساتھ دینے کی پاداش میں روس نے جرمنی کو زور دار دھچکا دے دیا ہے۔
غیر ملکی میڈیا رپورٹ کے مطابق روس اور یوکرین کے درمیان جاری جنگ کے منفی اثرات دیگر ممالک پر بھی اب کھل کر سامنے آنے لگے ہیں۔
اس کی لپیٹ میں جرمنی بھی آیا ہے جس کے خلاف روسی صدر پیوٹن نے سخت اقدام اٹھالیا ہے۔
رپورٹ کے مطابق روسی حکومت نے جرمن سرکاری ملازمین کو روس چھوڑنے کی ہدایت جاری کردی ہے، جرمن حکومت نے اس بات کی تصدیق کرتے ہوئے بتایا کہ کچھ ایسی رپورٹس سامنے آئی ہیں جس میں کہا گیا ہے کہ روس میں کام کرنے والے سینکڑوں جرمن سرکاری ملازمین کو روس چھوڑنے کے لیے مجبور کیا جا رہا ہے۔
رپورٹ میں کہا گیا کہ روس کے اس سخت فیصلے کے سبب تعلیمی اور ثقافتی شعبوں میں کام کرنے والے سینکڑوں جرمن سرکاری ملازمین کو روس چھوڑنا پڑے گا، یہی نہیں جرمنی کو اب ماسکو میں اپنے سفارتی ملازمین کو کم کرنا ہوگا اور ماسکو میں گوئتھے انسٹی ٹیوٹ کلچرل آرگنائزیشن اور جرمن اسکولوں جیسے پبلک اداروں سے جرمن ملازمین کو ہٹانا ہوگا۔
اطلاعات یہ ہیں کہ روسی افسران کے ذریعے جرمن شہریوں کو جون کے اوائل تک کا وقت دیا گیا ہے۔
