شمر جوزف کو آسٹریلیا کیخلاف انکی بہترین پرفارمنس کا صلہ کیریئر کے آغاز میں ہی مل گیا، آئی سی سی نے برے اعزاز سے نواز دیا۔
شمر جوزف نے حال ہی میں آسٹریلیا اور ویسٹ انڈیز کے درمیان ہونے والے ڈرامائی ٹیسٹ سیریز میں سنسنی خیز ڈیبیو کیا تھا اور وہ اس کے فوراً بعد ہی پہلی بار آئی سی سی مینز پلیئر آف دی منتھ کا تاج اپنے سر پر سجانے میں کامیاب ہوگئے ہیں۔
انٹرنیشنل کرکٹ کونسل نے گزشتہ ہفتے شارٹ لسٹ ہونے والے ناموں کے اعلان کے بعد جنوری 2024 کے لیے آئی سی سی مینز اور ویمنز پلیئر آف دی منتھ ایوارڈ کا اعلان کیا ہے۔
آئرلینڈ کی ایمی ہنٹر کو گزشتہ ماہ زمبابوے کے خلاف ٹی ٹوئنٹی سیریز میں عمدہ کارکردگی دکھانے پر آئی سی سی ویمنز پلیئر آف دی منتھ قرار دیا گیا ہے۔ اس سیریز میں آئرلینڈ کی ویمنز ٹیم فاتح رہی تھی۔
آئی سی سی مینز پلیئر آف دی منتھ، شمر جوزف نے کہا کہ میں یہ ایوارڈ جیت کر بے حد خوش ہوں۔ عالمی سطح پر ایسا ایوارڈ ملنا بہت خاص ہے۔ میں نے آسٹریلیا کے خلاف کھیل کر ہر لمحے سے لطف اٹھایا۔
ویسٹ انڈیز سے تعلق رکھنے والے مینز پلیئر آف دی منتھ شمر جوزف نے اپنے کیریئر کا شاندار آغاز کیا ہے۔ آسٹریلیا کے خلاف ٹیسٹ سیریز میں 24 سالہ نوجوان بولر نے بین الاقوامی کرکٹ میں اپنی پہلی گیند پر ہی اسٹیو اسمتھ کو آؤٹ کیا تھا۔
ٹیسٹ کرکٹ میں اپنی پہلی اننگز میں انھوں نے ایڈیلیڈ میں کینگروز کے خلاف پانچ وکٹیں حاصل کیں، جس میں مارنس لیبوشن اور کیمرون گرین کے علاوہ اسمتھ کی قیمتی وکٹ بھی شامل رہی۔
تاہم برسبین میں دوسرے ٹیسٹ میں ان کا جادو سر چڑھ کر بولا۔ دوسری اننگز میں آسٹریلیا کے خلاف فتح ناقابل فراموش کارکردگی کا مظاہرہ کرتے ہوئے شمر نے 68 رنز کے عوض سات وکٹیں حاصل کیں –
اس جیت نے ویسٹ انڈیز کو 1-1 سے ڈرا کرنے کا موقع بھی فراہم کیا جبکہ جوزف نے اپنے شاندار ڈیبیو پر پلیئر آف دی سیریز کا ایوارڈ بھی اپنے نام کیا تھا۔
