The news is by your side.

عمران خان کے خلاف مبینہ بیٹی کی معلومات چھپانے پر نااہلی کی درخواست کا تحریری حکم نامہ جاری

اسلام آباد : اسلام آباد ہائیکورٹ نے عمران خان پر مبینہ بیٹی کی معلومات چھپانے پر نااہلی کی درخواست قابلِ سماعت ہونے پر وکلا سے معاونت طلب کرلی۔

تفصیلات کے مطابق اسلام آباد ہائیکورٹ نے عمران خان کے خلاف مبینہ بیٹی کی معلومات چھپانے پر نااہلی درخواست کا تحریری حکم نامہ جاری کردیا۔

چیف جسٹس عامر فاروق نے شہری کی درخواست پر سماعت کا تحریری حکم نامہ جاری کیا ، جس میں عمران خان ، الیکشن کمیشن سمیت فریقین کو 2 ہفتوں کیلئے پری ایڈمشن نوٹس جاری کیا ہے۔

جس میں کہا گیا ہے کہ پٹیشن میں میانوالی سے منتخب رکن قومی اسمبلی عمران خان کی نااہلی کی استدعا کی گئی ہے، پٹیشنر کے مطابق عمران خان نے کاغذات نامزدگی جمع کراتے وقت غلط معلومات فراہم کیں، عمران خان نے اپنے بچوں کی تفصیل میں دو کا ذکر کیا اور ایک کی معلومات چھپائیں۔

تحریری حکم نامے میں کہا ہے کہ عدالت نے پٹیشنر کے وکیل سے درخواست کے قابل سماعت ہونے پر دلائل طلب کیے، پوچھا گیا کہ آرٹیکل 199 کے تحت ہائی کورٹ یہ کیس سن سکتی ہے یا معاملہ الیکشن کمیشن جانا چاہئے؟۔

عدالتی حکم میں کہا گیا ہے کہ پٹیشنر کے وکیل نے عدالتی نظیر پیش کرتے ہوئے کہا کہ عدالت اس معاملے کو دیکھ سکتی ہے، وکیل نے کہا کہ عدالت کا دائرہ اختیار ہے کہ وہ اس کا جائزہ لے۔

تحریری حکمنامے میں کہا گیا ہے کہ فریقین کے وکلا آئندہ سماعت پر درخواست کے قابل سماعت ہونے پر عدالت کی معاونت کریں۔

Comments

یہ بھی پڑھیں