اسلام آباد : اسلام آباد ہائیکورٹ نے سابق پی ٹی آئی رہنما فواد چوہدری کے ناقابل ضمانت وارنٹ گرفتاری معطل کردیے۔
تفصیلات کے مطابق اسلام آباد ہائی کورٹ میں سابق پی ٹی آئی رہنما فواد چوہدری کی الیکشن کمیشن کے ناقابل ضمانت وارنٹ گرفتاری کیخلاف درخواست ہوئی ، اسلام آباد ہائیکورٹ کے جسٹس طارق محمود جہانگیری نےسماعت کی۔
ایڈووکیٹ فیصل چوہدری نے بتایا کہ الیکشن کمیشن میں فواد چوہدری کیخلاف توہین کمیشن کی کارروائی جاری ہے، جس پر عدالت نے کہا کہ چیف جسٹس نےفیصلہ دیا توہین کمیشن کی کارروائی جاری رہےگی، چیف جسٹس نےفیصلےمیں کمیشن کو معاملےپرحتمی فیصلہ جاری کرنے سے روکا ہے، جو بھی ہے وہ بھی عدالت ہے، آپ کو نوٹس جاری ہوئےہیں۔
جسٹس طارق محمود جہانگیری نے استفسار کیا کہ کیاوجہ ہےکہ آپ وہاں ذاتی حیثیت میں پیش نہیں ہورہے؟ آپ نےتوہائیکورٹ کے آرڈر کی بھی خلاف ورزی کی ہے تو وکیل فیصل چوہدری نے بتایا کہ ہم اسی دن اسلام آباد ہائیکورٹ کے سامنے پیش ہوئے تھے۔
جسٹس طارق محمود کا کہنا تھا کہ الیکشن کمیشن کونسا کراچی میں ہے،ہائیکورٹ سے وہاں چلےجاتے، آپ نےہائیکورٹ کے آرڈرکی خلاف ورزی کی ہے،کمیشن میں پیش نہیں ہورہے، جس پر وکیل فیصل چوہدری کا کہنا تھا کہ ہم الیکشن کمیشن کے سامنے پیش ہونے کو تیار ہیں۔
اسلام آباد ہائیکورٹ نےفوادچوہدری کے ناقابل ضمانت وارنٹ گرفتاری معطل کرتے ہوئے فوادچوہدری کو20 جولائی کو الیکشن کمیشن کے سامنے پیش ہونے کا حکم دے دیا۔
جسٹس طارق محمود جہانگیری نے کہا کہ آئندہ تاریخ پرالیکشن کمیشن کے روبروپیش نہ ہوئے تو اس کے نتائج ہوں گے، توہین عدالت کارروائی شروع کروں گا۔
یاد رہے الیکشن کمیشن نےعدم حاضری پرفواد چوہدری کے ناقابل ضمانت وارنٹ جاری کئے تھے، جس کے بعد فواد چوہدری نے ناقابل ضمانت وارنٹ کیخلاف عدالت سے رجوع کیا تھا۔
