لاہور: چیئرمین پی ٹی آئی نے ترکیہ کے صدر اور عوام کو یوم جمہوریت کی مبارکبادی دی ہے۔
سماجی رابطے کی ویب سائٹ ٹوئٹر پر جاری بیان میں چیئرمین پی ٹی آئی عمران خان نے کہا کہ یومِ جمہوریت اور قومی اتحاد کے موقع پر میں صدر اردوگان اور ترکیہ کے عوام کو دلی مبارکباد پیش کرتا ہوں۔
انہوں نے لکھا کہ پندرہ جولائی دو ہزار سولہ اس دن کی یاد دلاتا ہے جب صدر اردوگان نے اہلِ ترکیہ کی مدد سےاپنے خلاف فوجی بغاوت کی کوشش ناکام بنائی۔
I extend my congratulations to President Erdogan & the people of Turkiye on Democracy & National Unity Day of Turkiye (Demokrasi ve Milli Birlik Günü). 15 July 2016 commemorates the day President Erdogan with the support of the Turkish people defeated attempted coup against him.
— Imran Khan (@ImranKhanPTI) July 15, 2022
یاد رہے کہ چھ سال قبل آج کے روز ہی ترک فوج کے باغی دستوں نے صدر رجب طیب اردگان کی حکومت کا تختہ پلٹ کر اقتدار پر قبضہ کرنے کی کوشش کی تھی تاہم ترک عوام نے فوجی بغاوت کو ناکام بنادیا تھا۔
باغی فوجیوں نے دعویٰ کیا تھا کہ ہماری کارروائی کا مقصد ملک میں آئینی و جمہوری انسانی حقوق کی بحالی ہے اور جمہوری قدروں کو استحکام بخشنے کے لیے ہم اقتدار حاصل کرنا چاہتے ہیں،ناکام فوجی بغاوت میں اعلیٰ فوجی افسران شامل تھے جنہوں نے ترک فوج کے سربراہ جنرل خلوصی آکار سمیت متعدد اعلیٰ فوجی افسران کو یرغمال بنالیا تھا تاہم رجب طیب کے حامی فوجیوں اور عوام نے ملکر بغاوت ناکام بنادی تھی ۔
مسلح فوجی بغاوت کے نتیجے میں 194 افراد ہلاک ہوئے تھے جن میں سے 94 سے زائد باغی فوجی شامل تھے، اس واقعے کے بعد 25 کرنل اور 5 جنرلز کو عہدوں سے فارغ کرکے سزائیں دی گئیں تھیں۔
