دبئی: متحدہ عرب امارات کی ریاست عجمان میں عدالت نے 12 سالہ بچے سے زیادتی کرنے والے امام مسجد کو 5 سال قید کی سزا سنادی۔
عرب میڈیا کے مطابق عجمان میں امام مسجد نے 12 سالہ بچے کو کئی بار زیادتی کا نشانہ بنایا، مقامی عدالت نے ایک ایشیائی ملک سے تعلق رکھنے والے امام مسجد کو پانچ سال قید کی سزا سنادی جبکہ سزا کی مدت ختم ہونے کے فوری بعد اُسے ڈی پورٹ کردیا جائے گا۔
عدالت میں مقدمے کی سماعت کے دوران استغاثہ نے موقف اختیار کیا کہ ایک 31 سالہ ایشیائی باشندہ الجرف 2 کے علاقے میں واقع ایک چھوٹی مسجد کا امام تھا، بچہ اس مسجد میں نماز پڑھنے جاتا تھا۔
مزید پڑھیں: دبئی: خاتون سے جنسی زیادتی کا الزام، عدالت نے مصری شہری پر فرد جرم عائد کردی
بچہ اکثر نماز کے بعد دیر سے گھر پہنچتا تو اس کی والدہ نے ڈانٹ ڈپٹ کر پوچھا کہ وہ دیر سے کیوں آتا ہے جس پر بچے نے امام مسجد کی جانب سے کی جانے والی زیادتی کا بھانڈا پھوڑ دیا۔
بچے نے انکشاف کیا کہ امام مسجد نماز ختم ہونے کے بعد اسے 5 درہم کا نوٹ دے کر اپنے حجرے میں لے جاکر زیادتی کا نشانہ بناتا تھا۔
بچے کے اس انکشاف کے بعد والدین نے قریبی پولیس اسٹیشن میں رپورٹ درج کرادی۔
فرانزک رپورٹ سے بھی امام مسجد کی بچے سے زیادتی کی تصدیق ہوئی، عدالت نے جرم ثابت ہونے پر امام مسجد کو 5 سال قید کی سزا سنائی اور سزا مکمل ہونے کے بعد ملزم کو ڈی پورٹ کردیا جائے گا۔
