ریاض: پاکستان نے سعودی اقامہ رکھنے والوں سمیت عمرہ زائرین کی مشکلات آسان کرنے کے لیے سعودی حکومت سے رابطہ کرلیا اور معاملے کو سنجیدگی سے دیکھ رہا ہے۔
تفصیلات کے مطابق سعودی عرب میں قائم پاکستانی قونصل خانے نے ایک خصوصی ٹیم تشکیل دے دی ہے جو مملکت میں پھنسے پاکستانیوں کی مدد کے لیے ہرممکن کوشش کررہی ہے۔ جبکہ سفری پابندیوں کے باعث اقامہ ہولڈرز کو درپیش مسائل کے حل کے لیے بھی سعودی حکام سے بات چیت جاری ہے۔
ایک انٹرویو میں قونصل جنرل خالد مجید کا کہنا تھا کہ سعودی عرب میں تقریباً 40 ہزار کے قریب عمرہ زائرین پھنسے ہوئے ہیں، جن کی ہر ممکن مدد کی جارہی ہے اور اقامہ ہولڈرز کا اہم معاملہ بھی زیرغور ہے۔
انہوں نے بتایا کہ پاکستان انٹرنیشنل ایئرلائن اور ایئر بلیو کے ذریعے 18 ہزار عمرہ زائرین سعودی عرب آئے جبکہ اتنی ہی تعداد میں زائرین خلیجی ممالک کی ایئرلائنز کے ذریعے بھی پہنچے۔
پاکستان اور بھارت میں موجود اقامہ ہولڈرز کے لئے سعودی عرب کا اہم اعلان
پاکستان کی کوشش ہے کہ عمرہ زائرین بروقت اور خیریت سے وطن واپس پہنچ جائیں۔
خیال رہے کہ سعودی عرب نے پاکستان اور بھارت سمیت کرونا وائرس سے متاثرہ ممالک سے اقامہ رکھنے والے تارکین کو واپس آنے کے لیے 72 گھنٹے کی مہلت دیتے ہوئے ان ممالک کے سفر پر عارضی پابندی بھی عائد کررکھی ہے۔
