اسلام آباد : وزیرداخلہ رانا ثناءاللہ نے کہا ہے کہ عدالتی حکم کے باوجود عمران خان پیش نہیں ہوئے، میری نظر میں عمران خان کی گرفتاری ہونی چاہیے۔
یہ بات انہوں نے اسلام آباد میں نیوز کانفرنس کرتے ہوئے کہی، ان کا کہنا تھا کہ عدالت کے کئی بار حکم کے باوجود عمران خان پیش نہیں ہوئے، عمرانی ٹولے سے قانون و انصاف کا مذاق بنا رکھا ہے، تمام ادارے محترم ہیں اوران کا احترام ہم سب پرلازم ہے۔
رانا ثناءاللہ نے کہا کہ یہ تماشہ پوری قوم2دن سے دیکھ رہی ہے، باربار ججز نے کہا جب تک عمران خان پیش نہیں ہوتے ریلیف نہیں ملے گا، عمران خان عدالت میں پیش ہونے کا وعدہ کرتے ہیں لیکن پیش نہیں ہوتے، میری نظر میں عمران خان کی گرفتاری ہونی چاہیے۔
انہوں نے کہا کہ عمران خان کی درخواست خارج کرنا نہیں بلکہ کارروائی بنتی ہے، عمران خان نے جس طرح کا رویہ اپنایا ہوا ہے انتہائی افسوسناک ہے، چیف جسٹس پاکستان کو بھی اس قسم کے رویے کا نوٹس لینا چاہیے،
وزیرداخلہ کا کہنا تھا کہ نوازشریف سے متعلق بھی آڈیوز سامنے آتی رہی ہیں، جج نے یہ بھی بتایا کہ اس سے کس طرح باقاعدہ دباؤ ڈال کرفیصلہ کروایا گیا، ایسے ہی ایک دو مواقع پر بھی آڈیوز آئیں لیکن ان پرکوئی ایکشن نہیں لیا گیا۔
