اسلام آباد : چیئرمین تحریک انصاف عمران خان کی مبینہ جعلی میڈیکل رپورٹ تیار کرنے پر ڈاکٹر رضوان تاج کو دس ارب روپے ہر جانے کا نوٹس بھجوا دیا گیا۔
تفصیلات کے مطابق چیئرمین تحریک انصاف عمران خان کی مبینہ طور پر جعلی میڈیکل رپورٹ تیار کرنے میں سہولت کاری کے معاملے پر میڈیکل رپورٹ تیار کرنے اور خلاف قانون جاری کرنے پر ڈاکٹرز کے خلاف قانونی چارہ جوئی کا آغاز کردیا۔
عمران خان کی منظوری سے پروفیسر ڈاکٹر رضوان تاج کو بھی قانونی نوٹس بھجوا دیا گیا ، پروفیسر ڈاکٹر رضوان تاج کو 10 ارب روپے کے ہرجانے کا نوٹس بھجوایا گیا ہے۔
نوٹس عمران خان کےوکیل بیرسٹرمحمداحمدپنسوتاایڈووکیٹ کی جانب سےبھجوایا گیا ، جس میں ڈاکٹر رضوان تاج سے جعلی اور من گھڑت رپورٹ تیارکرنے پر 10 ارب روپے ہر جانہ ادا کرنے کا مطالبہ کیا ہے۔
نوٹس میں کہا گیا ہے کہ ڈاکٹر رضوان تاج عمران خان سے غیر مشروط معافی مانگیں اور میڈیا پرنشر کریں ، ڈاکٹر رضوان تاج 14 روز میں معافی مانگیں بصورت دیگر قانون کا سامنا کرنے کیلئےتیار رہیں۔
ڈاکٹر رضوان کیخلاف دیوانی اور فوجداری قوانین کے تحت سخت کارروائی عمل میں لائی جائے گی اور ساتھ ہی جعلی میڈیکل رپورٹ کی تیاری و اجرا پر پروفیسر ڈاکٹر رضوان کیخلاف مقدمہ درج کرایا جائے گا
نوٹس میں کہنا ہے کہ جعلی میڈیکل رپورٹ کی تیاری اور اجرا پر پاکستان میڈیکل اینڈ ڈینٹل کونسل سےبھی رجوع کیا جائے گا۔
