صوبہ پنجاب میں کم عمر بچیوں اور بچوں کے ساتھ ہونے والی مبینہ زیادتی کے واقعات نے صاحب اولاد افراد کو ایک انجانے خوف میں مبتلا کردیا ہے، تواتر کے ساتھ ہونے والے واقعات کے باعث بچے اور بچیاں ذہنی دباؤ کا شکار ہونے لگے ہیں۔
دو روز قبل راولپنڈی کے علاقے جھنڈا چیچی میں نو سالہ زینب کو مبینہ زیادتی کے بعد قتل کردیا گیا تھی، بچی کی لاش پڑوسی کے گھر سے برآمد ہونے پر شہری شدید مشتعل ہوگئے تھے اور وحشی درندے کو انجام تک پہنچانے کی کوشش کی مگر پولیس نے بروقت کارروائی کرتے ہوئے ملزم کو حراست میں لیا اور تھانے منتقل کردیا۔
مشتعل افراد نے تھانے پر دھاوا بولتے ہوئے گرفتار ملزم کو حوالے کرنے کا مطالبہ کیاتھا، ابھی اس دلخراش واقعے کا طوفان تھما نہیں تھا کہ بورے والا کے نواحی گاؤں میں وحشی درندے نے سات سالہ بچے کو مبینہ زیادتی کا نشانہ بناڈالا۔
یہ بھی پڑھیں: ایک اور زینب سے درندگی، ننھی بچی زندگی کی بازی بھی ہار گئی
مبینہ زیادتی کا شکار ہونے والے بچے کو تشویشناک حالت میں اسپتال منتقل کردیا گیا ہے، جہاں اسے طبی امداد دی جارہی ہے، سفاک واقعے کے بعد ملزم فرار ہونے میں کامیاب ہوگیا ہے۔
واقعے سے متعلق مقامی پولیس کا کہنا ہے کہ ملزم کی تلاش شروع کردی گئی ہے، پولیس پارٹی جلد ملزم کو گرفتار کرتے ہوئے کٹہرے میں کھڑا کرے گی اور متاثرہ کو فوری انصاف فراہم کیا جائے گا۔
