نئی دہلی: نام نہاد سرجیکل اسٹرائیک کا دعوی بھارت کو مہنگا پڑ گیا، بھارتی سیکریٹری خارجہ وجے گوکھلے صحافیوں کے سوالات سن کر بوکھلا گئے اور جواب دیے بغیر ہی چلے گئے۔
تفصیلات کے مطابق بھارتی سیکریٹری خارجہ نے نام نہاد سرجیکل اسٹرائیک کے حوالے سےمختصر 3 منٹ کی پریس کانفرنس کی جس میں انہوں نے بھارتی فضائیہ کی کامیابیوں کے گُن گائے۔
وجے گوگھلے کا کہنا تھا کہ سرجیکل اسٹرائیک انٹیلی جنس رپورٹ کی بنیاد پر کی گئی، اس طرح کا حملہ وقت کی ضرورت تھا۔
کامیابی کے دعوے کرنے والے بھارت کے غبارے سے اُس وقت ہوا نکلی جب وزیرخارجہ سے صحافیوں نے سوال پوچھنے کی کوشش کی، سیکریٹری خارجہ پریس کانفرنس کے دوران سوالات سُن کر بوکھلا گئے۔
مزید پڑھیں: بھارتی دراندازی: ’ہم سوئے رہے لیکن فوج جاگتی رہی‘
وجے گوکھلے نے تین منٹ کی پریس کانفرنس کی، صحافیوں نے تکنیکی سوالات اٹھائے تو انہوں نے جواب دینا مناسب نہیں سمجھا اور وہاں سے فرار ہوگئے۔
دوسری جانب بھارتی وزیردفاع بھی نام نہاد سرجیکل اسٹرائیک سے لاعلم نکلیں، میڈیا گفتگو کے دوران جب اُن سے دراندازی سے متعلق سوال کیا گیا تو انہوں نے لاعلمی کا اظہار کیا۔
دوسری جانب بھارتی میڈیا نے پاک فضائیہ کی دو سال پرانی ویڈیو ریلیز کر کے کامیابی کا دعویٰ کیا جبکہ مذکورہ فوٹیج پاکستانی صارف نے دو سال قبل یوٹیوب پر شیئر کی تھی۔
یہ بھی پڑھیں: نام نہاد سرجیکل اسٹرائیک، بھارتی ویڈیو جعلی نکلی
یاد رہے کہ بھارتی طیاروں نے گزشتہ شب پاکستانی فضائی حدود میں داخل ہونے کی کوشش کی تھی جسے پاکستان ائیرفورس اور پاک فوج نے بھرپور طریقے سے ناکام بنا دیا تھا۔
