بھارتی اخبار نے دعویٰ کیا ہے کہ بھارت کی جدید ہائپر سونک میزائل کے تجربے کی تیاری کررہا ہے، یہ میزائل بھارت کو دشمن کے علاقے میں چند منٹوں میں حملہ کرنے کی صلاحیت دے گا۔
تفصیلات کے مطابق پاکستان کیخلاف ممکنہ جارحیت کی نیت سے بھارت تیزی سے حملہ آور نظام تیار کر رہا ہے۔
رپورٹ زی نیوز میں بتایا گیا کہ بھارت سب سے جدید ہائپرسونک میزائل کی آزمائش کی تیاری کر رہا ہے، یہ منصوبہ ڈی آر ڈی او کے خفیہ پروگرام پروجیکٹ وشنو کے تحت تیار ہوا ہے۔
زی نیوز کا کہنا تھا کہ اس میزائل کو ایشیا میں طاقت کے توازن کو بدلنے والاگیم چینجر قرار دیا جا رہاہے، یہ میزائل بھارت کو دشمن کے علاقے میں چند منٹوں میں حملہ کرنےکی صلاحیت دے گا۔
رپورٹ میں کہا گیا کہ یہ میزائل تقریباً 11,000 کلومیٹر فی گھنٹہ کی رفتار سے سفر کرتا ہے، 1500 کلو میٹر رینج والا میزائل ایک سیکنڈ میں 3 کلو میٹر کا فاصلہ طے کرنے کی صلاحیت رکھتا ہے۔
یہ میزائل بیلسٹک میزائلز کے برعکس کم بلندی پر پرواز کر سکتا اور اپنی سمت بھی بدل سکتا ہے جبکہ دشمن کے ریڈار، بحری بیڑے یا کمانڈ سینٹرز کو تباہ کرنے کی صلاحیت رکھتا ہے۔
بھارت اس ٹیکنالوجی کیساتھ امریکا، روس اور چین جیسے ممالک کی صف میں شامل ہو جائے گا۔
پاکستان اس خطرناک رجحان پر تحفظات رکھتا ہےاور اسے خطے کے امن کے لیے نقصان دہ سمجھتا ہے ، بھارت کا ہائپرسونک میزائل تجربہ خطے میں طاقت کے توازن کو مزید بگاڑ کر اسلحے کی نئی دوڑ کو جنم دے گا۔
