نئی دہلی: بھارت میں ہندو انتہاپسندوں نے سرعام رفع حاجت پر 2 دلت بچوں کو قتل کردیا۔
غیرملکی خبررساں ادارے کے مطابق بھارتی ریاست مدھیا پردیش میں سرعام رفع حاجت پر 2 دلت بچے قتل کردئیے گئے، پولیس نے 2 افراد کو گرفتار کرکے مقدمہ درج کرلیا۔
رپورٹ کے مطابق 12 سال کی روشنی اور 10 سال کے اویناش کو بدھ کے روز اس وقت ڈنڈے مار مار کر قتل کردیا گیا جب وہ گاؤں میں سڑک کنارے رفع حاجت کررہے تھے۔
بچوں کے ورثا کا کہنا ہے کہ ان کے گھر میں ٹوائلٹ نہیں ہے، واضح رہے کہ بھارت میں لاکھوں غریب افراد کھلے آسمان تلے رفع حاجت کرنے پر مجبور ہیں۔
پولیس نے کارروائی کرتے ہوئے بچوں کو قتل کرنے والے دونوں بھائیوں کو گرفتار کرکے ان کے خلاف قتل اور نچلی ذات کے افراد کو تشدد کا نشانہ بنانے کے الزامات کے تحت مقدمہ درج کرلیا ہے۔
مزید پڑھیں: گاڑی کیوں خریدی؟ دلت نوجوان پر انتہا پسند ہندوؤں کا وحشیانہ تشدد
پولیس کے مطابق بچوں کو اونچی ذات سے تعلق رکھنے والے بھائیوں حاکم سنگھ یادیو اور رمیشور یادیو نے قتل کیا۔
دوسری جانب گاؤں والوں کا کہنا ہے کہ جن افراد نے بچوں کو تشدد کرکے قتل کیا، ان میں سے ایک شخص کا دماغی توازن درست نہیں اور وہ ماضی میں بھی عجیب و غریب حرکتیں کرتا رہا ہے۔
دلت اور دوسری نچلی ذات کے حقوق کے لیے کام کرنے والے سماجی رضاکاروں اور تنظیموں نے الزام عائد کیا ہے کہ پولیس اونچی ذات کے ہندوؤں کو بچانے کی کوشش کررہی ہے۔
اترپردیش کی سابقہ وزیراعلیٰ مایا وتی نے واقعے کی مذمت کرتے ہوئے کہا ہے کہ دلتوں کو ہمیشہ ظلم و جبر کا نشانہ بنایا جاتا ہے۔
