نئی دہلی : بھارتی فوج کا طیارہ گرکر تباہ ہوگیا، خوش قسمتی سے پائلٹ کی جان بچ گئی تاہم معمولی چوٹیں آئیں، طیارہ معمول کی تربیتی پرواز پر تھا۔
تفصیلات کے مطابق بھارتی فضائیہ کا مگ21 بائیسن لڑاکا طیارہ گزشتہ روز راجستھان میں معمول کی تربیتی پرواز کے دوران گر کر تباہ ہوگیا۔ حادثے میں پائلٹ کو معمولی چوٹیں آئیں اور گاؤں کے مقامی رہائشیوں نے انہیں ہسپتال پہنچایا۔
بھارتی میڈیا کے مطابق دفاعی ترجمان لیفٹیننٹ کرنل امیتابھ شرما نے بتایا ہے کہ بھارتی وقت کے مطابق طیارہ شام تقریباً ساڑھے پانچ بجے بارمیڑ کے ماتسر گاؤں کے غیر آباد علاقے میں گر کر تباہ ہوا، حادثے کے نتیجے میں مبینہ طور پر ایک جھونپڑی کو آگ لگی۔
مقامی ضلعی عہدیدار نے میڈیا کو بتایا کہ حادثے میں کسی جانی نقصان کی اطلاع نہیں ہے۔ طیارے کے ملبے کے کچھ حصے کو آگ لگ گئی اور یہ بڑے علاقے میں بکھرا ہوا ہے۔
حادثے کے بعد انڈین فضائیہ کی جانب سے ایک ٹویٹ میں کہا گیا ہے کہ ’مگ 21 بائیسن طیارے میں تربیتی پرواز کے لیے ٹیک آف کرنے کے بعد تکنیکی خرابی پیدا ہوئی۔
انڈین فضائیہ نے اپنے ٹوئٹر پیغام میں مزید کہا ہے کہ طیارہ حادثے کی وجہ معلوم کرنے کے لیے انکوائری کا حکم دے دیا گیا ہے۔
روسی ساختہ سنگل انجن، سنگل سیٹر ملٹی رول فائٹر/گراؤنڈ اٹیک ایئر کرافٹ انڈین فضائیہ کی ریڑھ کی ہڈی سمجھا جاتا ہے۔ اس کی زیادہ سے زیادہ رفتار 2230 کلومیٹر فی گھنٹہ ہے۔
یاد رہے کہ مگ 21 طیارے انڈین فضائیہ میں کئی دہائیوں سے شامل ہیں اور ان طیاروں کے حادثات اکثر دیکھنے میں آتے رہتے ہیں۔
