راولپنڈی: بھارتی فورسز نے لائن آف کنٹرول (ایل او سی ) پر بلا اشتعال فائرنگ کی جس کے نتیجے میں سپاہی شہید ہوگئے۔
پاک فوج کے شعبہ تعلقات عامہ (آئی ایس پی آر) کے مطابق بھارتی فوج کی ایل او سی پر اشتعال انگیزیوں کا سلسلہ جاری ہے، بھارتی فوج نے ایل او سی کے دیوا سیکٹر پر جنگ بندی معاہدے کی خلاف ورزیاں کیں۔
آئی ایس پی آر کے مطابق پاک فوج نے فوری اور موثر جوابی کارروائی کی جس سے بھارتی فوجیوں کو شدید جانی نقصان اٹھانا پڑا۔
ترجمان پاک فوج کے مطابق فائرنگ کے تبادلے میں 28 سالہ سپاہی نبیل لیاقت شہید ہوگئے، سپاہی نبیل لیاقت مردانہ وار لڑتے ہوئے وطن پر قربان ہوگئے۔
یہ پڑھیں: بھارتی فورسز کی ایل او سی پر بلا اشتعال فائرنگ، 2 معمر افراد زخمی
آئی ایس پی آر کا کہنا ہے کہ شہید اہلکار نبیل لیاقت کا تعلق گوجر خان سے ہے۔
واضح رہے کہ گزشتہ دنوں بھی بھارتی فورسز نے ایل او سی کے خنجر اور بروہ سیکٹرزپر بلا اشتعال فائرنگ کی تھی جس کے نتیجے میں دو معمر افراد زخمی ہوگئے تھے۔
یاد رہے کہ 22 دسمبر کو بھی بھارتی فوج کی ایل او سی پر بلا اشتعال فائرنگ سے معمر خاتون شہید اور 4 سالہ بچی نایاب سمیت 3 شہری زخمی ہوگئے تھے۔
