کویت میں جعلی ڈگریوں کے حامل غیرملکی انجینئروں کیخلاف گھیرا تنگ کردیا گیا، متعلقہ محکمہ نے کارروائی کرتے ہوئے 4 بھارتیوں سمیت 7افراد کو پکڑ لیا۔
کویت کی پبلک اتھارٹی برائے افرادی قوت کے تعاون سے کویت سوسائٹی آف انجینئرز نے انجینئرنگ سرٹیفکیٹس کی جانچ پڑتال کی ہے تاکہ ان کی درستگی اور منظوری کو یقینی بنایا جاسکے۔
ایک رپورٹ کے مطابق خودکار نظام کے ذریعے جمع کرائے گئے کل 5,248 سرٹیفکیٹس میں سے 4,320 انجینئرنگ سرٹیفکیٹس گزشتہ چھ ماہ کے دوران مختلف ممالک کے رہائشیوں کی جانب سے تصدیق کے لیے جمع کرائے گئے تھے۔
تصدیق کے دوران انجینئرنگ کے سات جعلی سرٹیفکیٹ نکلے جن میں سے چار بھارتی شہریت کے تارکین وطن جبکہ باقی وینزویلا، اردنی اور مصری شہریت سے تعلق رکھنے والوں کے تھے۔
رپورٹ میں بتایا گیا ہے کہ 74 سرٹیفکیٹس کی ابھی تک تصدیق نہیں ہوئی ہے اور فی الحال 928 انجینئرنگ سرٹیفکیٹس کی تصدیق ہو رہی ہے۔
اس کے علاوہ کویت سوسائٹی آف انجینئرز کے ایک سرکاری ذریعے نے تصدیق کی ہے کہ جعل سازوں اور ان لوگوں کے خلاف قانونی اقدامات کیے گئے جنہوں نے انہیں انجینئرز کے طور پر کام کرنے کے لیے بھرتی کا ویزا جاری کرنے کا اختیار دیا۔
