راولپنڈی: بھارتی فوج نے ایل او سی کی ایک بار پھر خلاف ورزی کرتے ہوئے بلااشتعال فائرنگ کی ہے جس کے نتیجے میں 3 شہری زخمی ہوگئے۔
پاک فوج کے شعبہ تعلقات عامہ (آئی ایس پی آر) کے مطابق بھارتی فوج کی جانب سے لائن آف کنٹرول پر شہری آبادی کو نشانہ بنایا گیا ہے جس کے نتیجے میں 3 شہری زخمی ہوگئے۔
آئی ایس پی آر کے مطابق بھارتی فوج نے باگسر سیکٹر پر شہری آبادی کو نشانہ بنایا، زخمی شہریوں کا تعلق ضلع بھمبر کے گاؤں مندیکا سے ہے۔
واضح رہے کہ 20 اکتوبر کو بھارتی فوج کی ایل او سی پر جارحیت کا پاک فوج نے منہ توڑ جواب دیا تھا جس کے نتیجے میں 9 بھارتی فوجی ہلاک ہوگئے تھے۔
مزید پڑھیں: ایل او سی پر بھارتی جارحیت، پاکستان کا منہ توڑ جواب، 9 بھارتی فوجی ہلاک
ڈائریکٹر جنرل آئی ایس پی آر میجر جنرل آصف غفورکا کہنا تھا کہ اس جوابی کارروائی میں دو بھارتی بنکرز تباہ اور کئی بھارتی فوجی زخمی بھی ہوئے۔ جبکہ بھارتی فائرنگ سے ایک جوان لانس نائیک زاہد اور 5 شہری شہید ہوگئے۔
یاد رہے کہ 11 اکتوبر کو بھی بھارتی فوج کی جانب سے لائن آف کنٹرول پر بلااشتعال فائرنگ کی گئی تھی جس کے نتیجے میں تین افراد زخمی ہوگئے تھے۔
اس سے قبل 10 اکتوبر کو بھارتی فوج نے ایل او سی کے مختلف سیکٹرز پر فائرنگ کی تھی جس کے نتیجے میں سپاہی نعمت ولی شہید اور 2 خواتین زخمی ہوگئی تھیں۔
