کھانسی کا آلودہ شربت بیچنے کے کیس میں ازبکستان کی عدالت نے بھارتی شہری سمیت 23 افراد کو بیس سال قید سنائی ہے۔
خبر رساں ایجنسی کے مطابق بھارتی شہری رگھوویندرا پرتاپ سنگھ ازبکستان میں دوائیں فراہم کرنے والی کمپنی کا افسر تھا، عدالت نے چھ ماہ طویل مقدمے کی سماعت میں 23 افراد کو 68 بچوں کی موت کا ذمے دار ٹھرایا۔
عدالت نے کیس کے ملزمان کو 2 سے 20 سال کی سزائیں سنائیں، 68 بچوں نے مبینہ طور پر اتر پردیش کی ایک دوا ساز کمپنی کی طرف سے تیار کردہ آلودہ کھانسی کا شربت پیا تھا جس کے نتیجے میں ان کی موت واقع ہوئی جبکہ 4 بچے معذور ہوگئے تھے۔
رپورٹ میں کہا گیا ہے کہ ملزمان ٹیکس چوری، غیر معیاری، جعلی ادویات کی فروخت، دفتر کے غلط استعمال، غفلت، جعلسازی اور رشوت کے مرتکب پائے گئے ہیں۔
عدالت نے یہ بھی کہا کہ آلودہ شربت کے استعمال سے مرنے والے 68 بچوں کے خاندانوں میں سے ہر ایک کو 80,000 امریکی ڈالر کا معاوضہ ادا کیا جائے گا۔
واضح رہے کہ رگھوویندرا پرتاپ سنگھ اور دیگر افراد کو دسمبر 2022 میں بچوں کی اموات کے کیس میں گرفتار کیا گیا تھا۔
