نئی دہلی: بھارت کی فضائیہ کا سالخوردہ مگ 21 جنگی طیارہ گوالیار کے قریب گر کر تباہ ہو گیا ، جہاز میں سوار دونوں پائلٹ بروقت اخراج میں کامیاب رہے۔
تفصیلات کے مطابق بھارتی ایئر فورس کا مگ 21 طیارہ تربیتی پرواز تھا اور اسے مدھیہ پردیش کے علاقے گوالیار میں حادثہ پیش آیا ہے ، جہاز میں موجود دونوں پائلٹ ایمرجنسی لینڈنگ کرگئے۔لینڈنگ کرنے والوں میں ایک گروپ کیپٹن اور ایک اسکواڈرن لیڈر تھا۔
بھارتی میڈیا کے مطابق طیارہ گرتے ہی اس میں آگ لگ گئی تھی ، حکام نے طیارہ حادثے کی تحقیقات کا حکم دے دیا ہے اور اس وقت تک میڈیا کو حادثے کی وجوہات بتانے سے معذرت کرلی ہے۔
یاد رہے کہ بھارتی فضائیہ کے جنگی طیارے بوسیدہ ہونے کے سبب گرنے کی وقتا فوقتا اطلاعات سامنے آتی رہتی ہیں، گذشتہ ماہ ایک بھارتی لڑاکا طیارہ آسام کے علاقے میں گر کے تباہ ہوا تھا، جس میں دونوں پائلٹ شدید زخمی ہوئے تھے جنہیں ہسپتال منتقل کر دیا گیا تھا۔
اس سے قبل رواں سال فروری میں راجھستان کے علاقے جودھ پور میں بھی ایک بھارتی طیارہ گر کر تباہی کا شکار ہو گیا تھا۔
بھارتی طیارے گرنے کے واقعات یہیں تک محدود نہیں، بھارتی ائیرفورس حکام راجھستان میں گرنے والے مگ طیارے کی تحقیقات سے پہلے ایک اور مگ 21 جیٹ طیارے کے گرنے کی تحقیقات میں مصروف تھے جو ماہ فروری والے حادثے سے 3 ہفتے قبل راجھستان کے علاقے بیکانیکر ڈسٹرکٹ میں تباہ ہو گیا تھا۔
کچھ عرصہ قبل بھارتی فضائیہ کےچیف بی ایس دھنویا نے اپنی فضائیہ کو درپیش مخدوش حالات کابھانڈاپھوڑتے ہوئے کہا تھا کہ ہمارےطیارےبہت پرانےہیں،لوگ اتنی پرانی توگاڑیاں بھی نہیں چلاتے۔
یاد رہے کہ رواں برس فروری میں پاکستان اور بھارتی فضائیہ کی لائن آف کنٹرول پر ڈاگ فائٹ ہوئی تھی جس میں پاک فضائیہ نے دو بھارتی مگ 21 مار گرائے تھے اور ایک بھارتی پائلٹ کو حراست میں بھی لے لیا تھا ، جسے بعد ازاں جذبہ خیر سگالی کے تحت واپس بھیج دیا گیا تھا۔
