ممبئی: بولی وڈ کی کام یاب فلموں کے لیے موسیقی ترتیب دینے والے شرون راٹھور کرونا وائرس سے لڑتے ہوئے زندگی کی بازی ہار گئے۔
90 کی دہائی میں شرون راٹھور نے کئی فلموں کے گانوں کی موسیقی ترتیب دی جو سپر ہٹ ثابت ہوئے۔ فلمی دنیا میں شرون راٹھور اور ان کے ساتھی موسیقار ندیم سیفی کی جوڑی بہت مشہور تھی۔ ندیم سیفی نے شرون راٹھور کے انتقال کی تصدیق کرتے ہوئے گہرے دکھ اور افسوس کا اظہار کیا ہے۔
چند روز قبل شرون راٹھور کا کرونا ٹیسٹ مثبت آیا تھا۔ بھارتی موسیقار کو حالت بگڑنے پر ممبئی کے ایک اسپتال میں علاج کے لیے داخل کروایا گیا جہاں وہ وینٹی لیٹر پر رہنے کے بعد آج انتقال کرگئے۔
شرون راٹھور نے ’عاشقی‘، ’ساجن‘، ’دل ہے کہ مانتا نہیں‘، ’سڑک‘ اور ’دیوانہ‘ سمیت متعدد مقبول اور کام یاب فلموں کے گانوں کی موسیقی ترتیب دی تھی۔ ان کے سپرہٹ گانوں میں ‘دل نے یہ کہا ہے دل سے، سوچیں گے تمھیں پیار، تیری امید تیرا انتظار کرتے ہیں’ سمیت دیگر گانے شامل ہیں۔
