کراچی : بھارتی ایئرلائن کے طیارے نے مسافر کی طبیعت خراب ہونے پر کراچی ایئرپورٹ پر ہنگامی لینڈنگ کی لیکن طیارے کے لینڈ کرنے سے قبل ہی مسافر انتقال کر چکا تھا۔
تفصیلات کے مطابق بھارتی ایئرلائن کے طیارے کی کراچی ایئرپورٹ پر ہنگامی لینڈنگ ہوئی، دوران پرواز ایک مسافرکی طبیعت خراب ہونے پر ہنگامی لینڈنگ کی اجازت دی گئی۔
سی اے اے کے ترجمان نے تصدیق کی کہ بھارتی ایئرلائن کی پرواز نئی دلی سے قطر کے شہر دوحہ جارہی تھی کہ دوران پرواز ایک مسافر کی طبیعت خراب ہو گئی۔
بھارتی ایئرلائن کے طیارے کے کپتان نے میڈیکل ایمرجنسی کی اطلاع دی اور کراچی ایئر ٹریفک کنٹرول سے ہنگامی لینڈنگ کی اجازت مانگی تاہم مسافرلینڈنگ سے قبل ہی دوران پرواز انتقال کرگیا۔
سول ایوی ایشن اور وفاقی وزارت صحت کے ڈاکٹرز نے مسافر کو چیک کیا، نائیجیریا کا شہری عبداللہ لینڈنگ سے قبل ہی انتقال کرچکا تھا۔
مسافر کی عمرساٹھ سال ہے، مسافر کا ڈیتھ سرٹیفکیٹ جاری کردیا گیا، جس کے بعد بھارتی طیارہ مسافرکی میت اپنےہمراہ دوحہ لے کرروانہ ہوگیا۔
ذرائع نے بتایا تھا کہ اس سے قبل ایک ایئر ایمبولینس نے کولکتہ سے آذربائیجان کے لیے اڑان بھرنے کے بعد اسلام آباد انٹرنیشنل ایئرپورٹ پر تکنیکی لینڈنگ کی تھی۔
