بھارت کی ریاست کرناٹک میں ہونے والے اسمبلی انتخابات میں کانگریس نے وزیر اعظم نریندر مودی کی جماعت بھارتیہ جنتا پارٹی (بی جے پی) کو عبرتناک شکست دے دی۔
میڈیا رپورٹس کے مطابق کرناٹک اسمبلی انتخابات میں کانگریس نے 130 نشستوں پر کامیابی حاصل کر لی جبکہ بی جے پی صرف 66 نشستوں پر کامیاب ہو سکی۔ نتائج آنے کا سلسلہ جاری ہے۔
ریاستی اسمبلی میں کُل نشستوں کی تعداد 224 ہے جبکہ 113 نشستیں جیتنے والی جماعت اپنا وزیر اعلیٰ لا سکتی ہے۔ مذکورہ نتائج کے مطابق کانگریس کے وزیر اعلیٰ آنے کا قوی امکان ہے۔
کانگریس رہنما راہول گاندھی نے واضح اکثریت لینے پر مقامی رہنماؤں اور کارکنوں کو مبارکباد پیش کی اور کہا کہ جیت سے نفرت کا بازار بند اور محبت کی دکان کھل گئی۔
راہول گاندھی نے کہا کہ ہم نے نفرت کے بجائے محبت سے انتخابات میں حصہ لیا تھا، کرناٹک کے لوگوں نے ثابت کیا کہ وہ ملک سے محبت کرتے ہیں، غریبوں کی طاقت نے دولت دولت مند سرمایہ داروں کو عبرتناک شکست دے دی۔
کانگریس کی طرف سے مسلمان نائب وزیر اعلیٰ لانے کا امکان
کرناٹک میں کانگریس کے اقلیتی ونگ کے سینئر رہنما عمیر احمد خان نے جیت پر خوشی کا اظہار کیا۔
انہوں نے کہا کہ ہم ریاست میں مضبوطی سے حکومت چلائیں گے، ہو سکتا ہے کہ نائب وزیر اعلیٰ کیلیے مسلمان رہنما کا انتخاب کیا جائے گا۔
