The news is by your side.

Advertisement

”6 دن کا الٹی میٹم مت دیں، آپ 6 صدی تک اسلام آباد واپس نہیں آسکتے“

وفاقی وزیر اطلاعات و نشریات مریم اورنگزیب کا کہنا ہے کہ عمران خان حکومت کو چھ دن کا الٹی میٹم مت دیں، وہ اب چھ صدی تک اسلام آباد نہیں آ سکتے۔

اسلام آباد میں پریس کانفرنس کرتے ہوئے وزیر اطلاعات مریم اورنگزیب نے کہا کہ وزیر اعظم شہباز شریف آج رات 8 بجے قوم سے اہم خطاب کریں گے، عمران خان نے پریس ٹاک میں حیران کن انکشافات کیے ہیں، عمران خان نے آج خود تسلیم کیا کہ وہ ہار کر واپس گئے ہیں، جب غنڈہ گردی کی نیت ہو تو ایسے ہی نتائج نکلتے ہیں۔

وزیر اطلاعات نے کہا کہ ڈالر کی قیمت 189 روپے پر عمران خان نے پہنچائی، یہ نالائقی اور نااہلی کا بوجھ آج عوام بھگت رہی ہے جس کے باعث مشکل فیصلہ کرنا پڑا، 30 روپے پیٹرول مہنگا کرنے کے آپ کے وعدے کا بوجھ ہم نے اٹھایا، آپ نے آئی ایم ایف کیساتھ پیٹرول 30 روپے مہنگا کرنے کا معاہدہ کیا تھا، مشکل فیصلہ عوام کے لیے منصوبہ بندی کر کے مہنگا کیا ہے۔

مریم اورنگزیب نے کہا کہ ہم ایک قدم بڑھے، الیکشن کمیشن کو ہم نے خودمختار کیاہے، الیکشن کمیشن کا خود مختار، غیرجانبدار اور منصفانہ ہونا آئین میں درج ہے، الیکشن کمیشن نےکہا ای وی ایم مشین ٹھیک نہیں تو چڑھائی کردی، آرٹی ایس بٹھا کر اقتدار لینے والے کو کیا پتہ منصفانہ الیکشن کیا ہوتا ہے۔

انہوں نے کہا کہ عمران خان ناکام ہوگئے تو دھمکی دیتے ہیں کہ عدالت اپنی پوزیشن واضح کرے، عمران خان گولی کھائیں اور سکون کی نیند سوئیں، ٹی وی پر آنے کی ضرورت نہیں، 6 دن کا الٹی میٹم مت دیں، آپ 6 صدی تک اسلام آباد واپس نہیں آسکتے، سپریم کورٹ نے 11 اپریل کی رات اپنی پوزیشن واضح کردی تھی، اس رات سپریم کورٹ نے ڈپٹی اسپیکر کی رولنگ کو ریورس کیا تھا۔

مریم اورنگزیب نے کہا کہ اس وقت سپریم کورٹ پوزیشن واضح ہوگئی تھی کہ وہ آئین کیساتھ ہے، آپ اداروں اور سپریم کورٹ کو دھمکیاں نہ دیں، عمران خان کہتا تھا کہ وقت ہے سپریم کورٹ اور نیوٹرل بھی سوچ لیں، عوام نے اپنی ترقی اور روزگار کیساتھ کھڑے ہونے کا فیصلہ کیا ہے، عمران خان کی سیاست دفن ہو چکی ہے۔

Comments

یہ بھی پڑھیں