تہران: ایران نے خلیج میں امریکی ڈرون کو قبضے میں لے کر چھوڑ دیا۔
غیر ملکی میڈیا کی رپورٹ کے مطابق امریکی حکام کا کہنا ہے کہ پیر اور منگل کی درمیانی رات کو خلیج فارس میں ایران کے اسلامی انقلابی گارڈ کور (IRGC) نے ایک امریکی سمندری ڈرون کو قبضے میں لینے کی کوشش کی۔
امریکی حکام کے مطابق جب امریکی بحریہ کے جنگی جہاز اور ہیلی کاپٹر حرکت میں آ گئے تو ایران نے ڈرون کو چھوڑ دیا۔
امریکی میڈیا کے مطابق امریکی بحریہ کے ایک سینیئر کمانڈر نے واقعے کو ’شرمناک‘ اور ’بلاجواز‘ قرار دے دیا ہے۔
رپورٹس میں کہا گیا ہے کہ یہ پہلا واقعہ ہے کہ امریکی بحریہ کے مشرق وسطیٰ میں قائم 5 ویں بیڑے کی نئی ڈرون ٹاسک فورس کو ایران نے نشانہ بنانے کی کوشش کی ہے۔
The U.S. Navy prevented a support ship from Iran’s Islamic Revolutionary Guard Corps Navy (IRGCN) from capturing an unmanned surface vessel operated by the U.S. 5th Fleet in the Arabian Gulf, Aug. 29-30.
Read more ⬇️https://t.co/ff1fwHsmNV
— U.S. Naval Forces Central Command/U.S. 5th Fleet (@US5thFleet) August 30, 2022
اگرچہ ڈرون پکڑنے کا واقعہ کسی ناخوش گوار نتیجے پر ختم نہیں ہوا، تاہم یہ واقعہ امریکا اور ایران کے درمیان بڑھتی کشیدگی کے دوران پیش آیا ہے، دونوں ممالک کے درمیان جوہری معاہدے پر بات چیت کا سلسلہ تاحال معلق ہے۔
5 ویں بحری بیڑے کے ترجمان کمانڈر ٹموتھی ہاکنز نے بتایا کہ انقلابی گارڈز کے جنگی جہاز شاہد بازیار نے پیر کی رات دیر گئے بین الاقوامی پانیوں میں خلیج کے وسطی حصے میں امریکی سیل ڈرون ایکسپلورر سے ایک لائن منسلک کی، اور اسے کھینچنا شروع کر دیا، یہ سیل ڈرون سمندر کی دور سے نگرانی کے لیے کیمرے، ریڈار اور سینسر کا حامل ہے۔
انھوں نے کہا کہ بحریہ کی ساحلی گشتی کشتی USS تھنڈربولٹ اور ایک MH-60 سی ہاک ہیلی کاپٹر فوراً انقلابی گارڈز کے جہاز کے تعاقب کے لیے حرکت میں آ گئے، بحریہ نے شاہد بازیار کو ریڈیو کے ذریعے کال کر کے بتایا کہ ڈرون امریکی ہے، جس کے بعد ایرانی جہاز نے ڈرون کو چھوڑ دیا۔
