جسم میں خون کی کمی کا سب سے بڑا سبب آئرن کی کمی ہوتی ہے جو مناسب غذا کی کمی یا مختلف بیماریوں کی وجہ سے بھی ہوسکتی ہے۔
اس حوالے سے اے آر وائی نیوز کے پروگرام باخبر سویرا میں ماہر غذائیت ڈاکٹر آمنہ مجیب نے آئرن کی کمی ختم کرنے کا آسان حل بتادیا۔
انہوں نے بتایا کہ آئرن کی کمی کی وجہ سے جسم مناسب مقدار میں خون کے سرخ خلیات بنانے میں ناکام رہتا ہے۔ جسم کو آئرن کی ضرورت پروٹین ہیموگلوبن بنانے کے لیے بھی ہوتی ہے جو خون کے سرخ خلیات کو آکسیجن لے جانے میں مدد فراہم کرتا ہے۔
ڈاکٹر آمنہ مجیب کا کہنا تھا کہ حاملہ خواتین میں سے 40 فیصد خواتین حمل کے دوران خون کی کمی کا شکار ہوتی ہیں، جس کا براہ راست اثر بچے پر پڑتا ہے، کیونکہ جب ماں آئرن کی کمی کا شکار ہوگی تو بچہ بھی اسی تکلیف میں مبتلا ہوگا۔
دوران حمل خون کی کمی ایک ایسی حالت ہوتی ہے جس کے نتیجے میں خون میں ہیموگلوبن کی سطح کم ہوجاتی ہے،حاملہ خواتین کو چاہیے کہ اگر ان میں اس قسم کی علامات ظاہر ہو رہی ہوں تو خون کے ٹیسٹ لازمی کروائیں۔
انہوں نے کہا کہ خون کی کمی کا سب سے آسان ذریعہ فوڈ سپلیمنٹ ہوتے ہیں جنہیں صبح نہار منہ ناشتے سے ایک گھنٹہ پہلے اور رات کے کھانے سے ایک گھنٹہ پہلے کھانا ہوتا ہے۔
اس کے علاوہ خون کی کمی کو ختم کرنے کیلیے انڈے ہری سبزیاں اور وٹامن سے بھرپور پھلوں کا استعمال بہت ضروری ہے۔
