The news is by your side.

Advertisement

منرو نے گلیڈی ایٹرز کی بولنگ کا بھرکس نکال دیا، 10 وکٹوں سے شکست

ابوظبی: اسلام آباد یونائیٹڈ نے کولن منرو کی جارحانہ اننگز کی بدولت کوئٹہ گلیڈی ایٹرز کو باآسانی 10 وکٹوں سے شکست دے دی۔

تفصیلات کے مطابق پی ایس ایل 6 کے 18ویں میچ میں اسلام آباد یونائیٹڈ نے کوئٹہ گلیڈی ایٹرز کی جانب سے دیا جانے والا 134 رنز کا ہدف بغیر کسی کے نقصان کے 10 اوورز میں حاصل کرلیا۔

یونائیٹڈ کے اوپنر کولن منرو نے 90 رنز کی جارحانہ اننگز کھیلی، ان کی اننگز میں 5 چھکے اور 10 چوکے شامل تھے، عثمان خواجہ 27 گیندوں پر 41 رنز بنا کر نمایاں رہے۔

کولن منرو کے آگے گلیڈی ایٹرزکے بولر بے بسی کی تصویر نظر آئے، کوئی بھی بولر وکٹ حاصل نہیں کرسکا۔

نسیم شاہ نے اپنے پہلے ہی اوور میں 19 رنز دئیے جبکہ محمد حسنین نے اپنے دو اوورز میں 22 رنز دئیے، خرم شہزاد، محمد نواز بھی کوئٹہ کو وکٹ دلانے میں ناکام رہے۔

قبل ازیں کوئٹہ گلیڈی ایٹرز کی ٹیم مقررہ اوورز میں 133 رنز پر ڈھیر ہوگئی تھی اور اسلام آباد یونائیٹڈ کو جیت کے لیے 134 رنز کا ہدف دیا تھا، جیک ویدرالڈ 43 رنز بنا کر نمایاں رہے۔

کوئٹہ گلیڈی ایٹرز کے اوپنر اچھا آغاز فراہم کرنے میں ناکام رہے، عثمان خان 14 اور فاف ڈوپلیسی 5 رنز بنا کر پویلین لوٹ گئے۔

کپتان سرفراز احمد صرف 2 رنز پر محمد مویٰ کا شکار بنے، اعظم خان 26 رنز حسن علی کو وکٹ دے بیٹھے، جارح مزاج بلے باز آندرے رسل 13 رنز بناسکے۔

محمد نواز کو محمد وسیم نے 4 رنز پر بولڈ کیا، جیک وائلڈر موتھ 9 رنز بنا کر رن اؤٹ ہوئے۔

یونائیٹڈ کے محمد وسیم، محمد موسیٰ اور حسن علی نے دو، دو وکٹیں حاصل کیں، شاداب خان اور عاکف جاوید ایک، ایک وکٹ حاصل کرسکے۔

اس سے قبل اسلام آباد یونائیٹڈ کے کپتان شاداب خان نے ٹاس جیت کر سرفراز احمد الیون کو پہلے بیٹنگ کی دعوت دی تھی، یونائیٹڈ کی ٹیم میں دو تبدیلیاں کی گئی ہیں انجرڈ فہیم اشرف کی جگہ عاکف جاوید اور فواد احمد کی جگہ فاسٹ بولر محمد موسیٰ کو شامل کیا گیا ہے۔

شاداب خان کا کہنا تھا کہ ڈیو فیکٹر کی وجہ سے پہلے بولنگ کا فیصلہ کیا، پاور پلے میں جلد وکٹیں حاصل کرنے کی کوشش کریں گے، ہماری ٹیم کی بولنگ اچھی ہے بیٹنگ میں اچھی کارکردگی کا مظاہرہ کرنا ہوگا۔

سرفراز احمد کا کہنا تھا کہ ہمیں میچ جیتنے کے لیے اچھی کرکٹ کھیلنی ہوگی، آندرے رسل کی شمولیت سود مند ثابت ہوگی، کھلاڑیوں میں فاف ڈوپلیسی، جیکب ویٹیرلڈ، وائلڈرموتھ شامل ہیں۔

واضح رہے کہ ایونٹ میں دونوں ٹیموں کے درمیان یہ دوسرا میچ ہے، اسلام آباد یونائیٹڈ نے پہلے میچ میں گلیڈی ایٹرز کو چھ وکٹوں سے شکست دی تھی۔

اسکواڈ

Comments

یہ بھی پڑھیں