ایڈنبرا: اسکاٹ لینڈ کے ایک جزیرے سے متعلق معلوم ہوا ہے کہ وہاں صرف 32 افراد رہائش پذیر ہیں، اور جزیرے کو اب نئے مکینوں کی تلاش ہے۔
تفصیلات کے مطابق اسکاٹ لینڈ کے ضلع لوکابر کے ایک جزیرے کی آبادی اس وقت صرف 32 افراد پر مشتمل ہے، اور نئے مکینوں کے لیے جزیرے پر نئی تعمیرات کی جا رہی ہیں۔
اس سلسلے میں جزیرے کی ویب سائٹ پر بتایا گیا ہے کہ جزیرے پر جو مکانات بنائے جا رہے ہیں، اس کے منصوبے میں اسکاٹ لینڈ کی حکومت بڑا تعاون کر رہی ہے۔
کیا آپ نے کسی دور دراز جزیرے پر خاموش اور پر سکون زندگی کا تصور کیا ہے، جہاں آپ روزانہ ساحل پر لہروں کو سر پٹختا دیکھ سکیں، اگر یہ آپ کا خواب ہے تو اب یہ پورا ہو سکتا ہے، رم نامی یہ اسکاٹش جزیرہ اپنے مکینوں کی تعداد بڑھانا چاہتا ہے اور جزیرے کی جانب سے نئے مکینوں کے لیے اپیل کی گئی ہے۔
جزیرہ رم (Rum) چاہتا ہے کہ باہر والے ان نئے مکانوں کے لیے درخواستیں دیں جو جزیرے کے واحد گاؤں کنلوخ میں تعمیر ہو رہے ہیں، جزیرے پر زیادہ لوگوں کی ضرورت محسوس کی جا رہی ہے بالخصوص بچوں کی جنھیں اسکول میں داخل کیا جا سکے، جزیرے پر موجود لوگوں نے امید ظاہر کی ہے کہ ایسے نوجوان جوڑے جزیرے پر منتقل ہونا چاہیں گے جو صحت مند اور پرسکون ماحول چاہتے ہیں۔
ویب سائٹ پر بتایا گیا ہے کہ جزیرے پر ایک ہی پرائمری اور نرسری اسکول ہے، اب جہاں بچوں کی ضرورت ہے، بتایا گیا ہے کہ جزیرے کی آبادی میں صرف 6 بچے شامل ہیں۔
جزیرے پر تمام گھروں میں انتہائی اعلیٰ معیار کا فائبر براڈبینڈ موجود ہے، جزیرے پر ملازمتوں کے بھی وسیع مواقع ہیں جن میں سے بچوں کی دیکھ بھال، خوراک کی تیاری، ہاؤس مینٹی نینس، فش فارمنگ، سمندری اور پہاڑی سیاحت کے شعبے شامل ہیں۔
جزیرے پر جو گھر بنائے جا رہے ہیں وہ ایکو ہوم یعنی ماحول دوست گھر ہیں اور یہ دو بیڈرومز پر مشتمل ہیں۔
