بلوچستان کے ضلع قلعہ عبداللہ کے علاقے میں سیکیورٹی فورسز نے خوارجیوں کا چیک پوسٹ پر حملہ ناکام بنادیا۔
پاک فوج کے شعبہ تعلقات عامہ (آئی ایس پی آر) کے مطابق بلوچستان کے ضلع قلعہ عبداللہ کے علاقے گلستان میں خوارجیوں کا چیک پوسٹ پر حملہ سیکیورٹی فورسز نے بروقت کارروائی کرتے ہوئئے ناکام بنادیا۔
ترجمان پاک فوج کا بتانا ہے کہ خوارجیوں نے دھماکا خیز مواد سے بھری گاڑی چیک پوسٹ کی دیوار سے ٹکرائی، سیکیورٹی فورسز کی کارروائی میں دو خودکش بمباروں سمیت 5 خوارج مارے گئے۔
آئی ایس پی آر کا کہنا ہے کہ نائیک طاہر خان، لانس نائیک طاہر اقبال بہادری سے لڑتے ہوئے شہید ہوگئے۔
ترجمان پاک فوج کے مطابق علاقے میں دیگر دہشت گردوں کی تلاش کے لیے سینٹائزڈ آپریشن جاری ہے، سیکیورٹی فورسز دہشت گردی کے خاتمے کے لیے پرعزم ہیں، جوانوں کی یہ قربانیاں ہمارے عزم کو مزید تقویت دیتی ہیں۔
