غزہ: اسرائیلی فوج نے بربریت کی انتہا کردی، مسجد اقصیٰ میں نماز جمعہ کے لیے آئے فلسطینیوں پر فائرنگ کردی جس کے باعث 6 روزے دار شدید زخمی ہوگئے۔
تفصیلات کے مطابق اسرائیلی فوج نے مقبوضہ بیت المقدس میں مسجد اقصیٰ کے باب العامود کے سامنے مسجداقصیٰ میں نماز جمعہ کے لیے آنے والے فلسطینیوں پر اندھا دھند گولیاں چلادیں جس کے نتیجے میں کم سے کم چھ روزہ دار زخمی ہوگئے۔
غیر ملکی خبر رساں ادارے کا کہنا ہے کہ عینی شاہدین نے بتایا کہ صہیونی فوج نے مسجد اقصیٰ کے قریب فلسطینیوں کے ایک گروپ کو نشانہ بنایا جس کے نتیجے میں 6 فلسطینی شہری زخمی ہوگئے۔
اسرائیلی فوج نے فلسطینی شہریوں پر آنسوگیس کی شیلنگ بھی کی۔ ہلال احمر کے مطابق اسرائیلی فوج کی فائرنگ سے زخمی ہونے والے 6 فلسطینیوں میں 4 کو شدید زخمی ہونے کے اسپتال منتقل کیا گیا ہے۔
اسرائیلی فوج نے فلسطینی مظاہرین پر دھاتی گولیوں کا نشانہ بنایا جس کے نتیجے میں ٹانگوں اور جسم کے دیگر حصوں میں چوٹیں آئیں۔
خیال رہے اسرائیلی وزیراعظم نیتن یاہو کی ہدایت پر اسرائیلی فوج نے فلسطینیوں پر تابڑ توڑ حملے شروع کررکھے ہیں، حالیہ دنوں میں درجنوں شہری اسرائیلی گولیوں کا نشانہ بنے اور سینکڑوں تاحال زخمی ہیں۔
غزہ میں اسرائیلی جارحیت، تین روز میں 23 فلسطینی شہید
دریں اثنا قابض اسرائیلی فوج نے مسلمان آبادیوں پر فضائی حملے بھی کیے، اس دوران بچوں اور عورتوں سمیت متعدد افراد شہید ہوئے۔
دوسری جانب اسرائیلی حکام نے ڈھٹائی کا مظاہرہ کرتے ہوئے کہا تھا کہ فلسطینیوں کی جانب سے اسرائیل کے جنوبی حصے میں میزائل حملے کیے گئے تھے جس کے بعد فضائیہ نے غزہ میں حملے کیے۔
