یروشلم: اسرائیل نے فوج کو ایران پر حملے کی تیاری کا حکم دے دیا اور امریکا کو بھی حملے کی تیاری سے آگاہ کر دیا، اسرائیلی وزیر دفاع نے کہا ہے کہ عالمی برادری جان چکی ہے کہ ایران ان کے ساتھ گیم کھیل رہا ہے۔
تفصیلات کے مطابق اسرائیل کے جارحانہ عزائم کے باعث خطے میں نئی جنگ کا خطرہ پیدا ہوگیا ہے، اسرائیلی فورسز کو ایران پر حملے کی تیاری کا حکم ے دیا گیا ہے۔.
اسرائیلی اخبار نے دعویٰ کیا ہے کہ اسرائیلی وزیرِ دفاع بنی گینٹز نے امریکی وزیر دفاع لائیڈ آسٹن کو بھی ایران پر حملے کی تیاری سے آگاہ کر دیا ہے۔
اس حوالے سے اسرائیلی وزیر دفاع کا کہنا ہے کہ دنیا کی ایران کے ساتھ جوہری معاملے پر بات چیت کا کوئی نتیجہ نہیں نکلا، عالمی برادری جان چکی ہے کہ ایران ان کے ساتھ گیم کھیل رہا ہے۔
دوسری جانب ایران نے جوہری مذاکرات میں ’مثبت پیش رفت‘ کا دعویٰ کیا ہے، تہران کے چیف مذاکرات کار علی باقری نے ایرانی خبررساں ادارے کو بتایا کہ فریقین ایجنڈے پر موجود معاملات پر اتفاق رائے کے قریب ہیں۔
یاد رہے امریکی وزیر دفاع لائڈ آسٹن اور ان کے اسرائیلی ہم منصب بینی گینٹز نے حال ہی میں واشنگٹن میں ملاقات کی تھی، جس میں دونوں وزرا نے ایران کے ساتھ جاری جوہری مذاکرات کی نا کامی پر ایران کی جوہری تنصیبات پر حملے کا اشارہ دیا تھا۔
