ٹوکیو: میانمار میں فوجی بغاوت کے تین سال بعد بھی انسانی صورت حال تشویش ناک ہے، ایسے میں جاپان نے میانمار کو 3 کروڑ 70 لاکھ ڈالر کی مزید انسانی امداد دینے کا اعلان کیا ہے۔
جاپانی میڈیا رپورٹس کے مطابق وزیر خارجہ کامی کاوا یوکو نے جمعہ کو ایک نیوز کانفرنس میں کہا کہ جاپان نے میانمار کو تقریباً 3 کروڑ 70 لاکھ ڈالر کی اضافی انسانی امداد فراہم کرنے کا فیصلہ کیا ہے۔
وزارت خارجہ کا کہنا تھا کہ فوجی بغاوت کے تین سال بعد میانمار میں انسانی صورت حال بدستور انحطاط پذیر ہے، ملک بھر میں فضائی حملے اور لڑائی جاری ہے۔ انھوں نے کہا کہ ایک کروڑ 86 لاکھ افراد کو اب بھی انسانی امداد کی ضرورت ہے۔
جاپانی امداد میں خوراک اور ادویات کی تقسیم اور طبی خدمات کے ساتھ ساتھ حاملہ خواتین اور شیر خوار بچوں کے لیے بہتر غذا کی فراہمی شامل ہوگی، جاپانی حکومت عالمی ادارہ خوراک اور اقوامِ متحدہ کے اطفال فنڈ سمیت بین الاقوامی تنظیموں کے ساتھ ساتھ غیر سرکاری تنظیموں کے ذریعے یہ امداد فراہم کرنے کا منصوبہ رکھتی ہے۔
