امیر جماعت اسلامی پاکستان سراج الحق نے انتخابات پر اتفاق رائے کے لیے پارلیمانی پارٹیوں سے رابطے کرنے کا اعلان کرتے ہوئے منصورہ کے پلیٹ فارم سے مذاکرات کے آغاز کی دعوت دے دی۔

سراج الحق نے اپنے ایک بیان میں کہا کہ پنجاب اور خیبر پختونخوا میں الیکشن سے مسائل حل نہیں ہوں گے، جماعت اسلامی ایک ہی روز انتخابات کے حق میں ہے۔

انہوں نے کہا کہ پی ٹی آئی اور پی ڈی ایم کی لڑائی نے ملک میں آئینی بحران پیدا کیا، ایک دوسرے کی نفی کے بجائے مشترکات کی طرف آنے کی ضرورت ہے، مثبت پیش رفت جس کے لیے قوم ترس رہی ہے وہ کوئی نہیں ہے۔

ان کا کہنا تھا کہ ادارے متنازع ہو رہے ہیں، عدالتوں میں سیاسی مسائل حل نہیں ہوں گے، مارشل لا، ٹیکنوکریٹ یا صدارتی نظام سے بھی بہتری نہیں آئے گی، عوام ہی سے فیصلہ لینے سے مسائل حل ہوں گے۔

Comments